الماتى قالاسىندا 2 ءساۋىر كۇنى تاڭعى ۋاقىتتا جەتىسۋ اۋدانىنداعى نوۆگورودسكايا كوشەسىندە ورنالاسقان التى قاباتتى اكىمشىلىك عيماراتتان ءورت شىقتى. جالىن عيماراتتىڭ شاتىرى مەن سىرتقى قاپتاماسىن شارپىعان. ءورت جەڭىل تۇتانعىش ماتەريالداردىڭ بولۋى سەبەپتى جىلدام تارالعان. بۇل تۋرالى Aqshamnews.kz سايتى حابارلايدى.
توتەنشە جاعداي ورنىنا 25 ارنايى تەحنيكا مەن 85 ءورت ءسوندىرۋشى دەرەۋ تارتىلدى. سونىمەن قاتار، ءورتتى سوندىرۋگە ءبىرقاتار مەملەكەتتىك ەمەس ۇيىمدار دا كومەك كورسەتتى. اتاپ ايتقاندا، «الماتى سۋ» مەكەمەسى ءورت ءسوندىرۋ ءۇشىن سۋدى ۇزدىكسىز جەتكىزىپ وتىردى. بۇل ءورتتىڭ اۋقىمدى اۋماققا جايىلىپ كەتۋىنىڭ الدىن الۋعا كومەكتەستى.
وقيعا ورنىندا جەدەل باسقارۋ شتابى جۇمىس ىستەدى. مچس مالىمەتىنە سايكەس، ءورت سوندىرۋشىلەردىڭ جەدەل جانە ۇيلەسىمدى ارەكەتىنىڭ ناتيجەسىندە وتتىڭ كەڭىنەن تارالۋىنا جول بەرىلمەگەن. قىزىل جالىن تولىقتاي اۋىزدىقتالدى. باقىتىمىزعا وراي، ادام شىعىنى مەن جاراقات العاندار جوق.
«وقيعا ورنىندا جەدەل شتاب قۇرىلدى. سۋ ۇزدىكسىز جەتكىزىلىپ وتىردى. ءورت تولىق ءسوندىرىلدى. زارداپ شەككەندەر جوق»، – دەلىنگەن ق ر توتەنشە جاعدايلار مينيسترلىگىنىڭ رەسمي حابارلاماسىندا.
