الماتىدا بيزنەس سۋبەكتىلەرىنىڭ ءتولقۇجاتتاۋ جۇيەسى العاش رەت ەنگىزىلدى: بۇل قالاعا قالاي اسەر ەتەدى؟
الماتىدا «الماتى – ءبىزدىڭ ورتاق ءۇيىمىز» ناۋقانى، رەسپۋبليكالىق «تازا قازاقستان» باعدارلاماسى جانە جاڭا كورىكتەندىرۋ ەرەجەلەرى اياسىندا باستالعان 6 039 بيزنەس نىسانىنىڭ ءتولقۇجاتتاۋى اياقتالدى. 1 ساۋىردەن باستاپ كاسىپكەرلەر ءۇشىن كورىكتەندىرۋ ءتولقۇجاتىن مىندەتتى تۇردە ساقتاۋ ەنگىزىلەدى، دەپ حابارلايدى aqshamnews.kz
كورىكتەندىرۋگە كىم جاۋاپتى؟
جاڭا تالاپقا سايكەس، ءاربىر بيزنەس كورىكتەندىرۋ ءتولقۇجاتىن الىپ، وعان تيەسىلى اۋماقتىڭ تازالىعى مەن ءتارتىبىن ساقتاۋعا مىندەتتى. بۇل تالاپ مەنشىك نىسانىنا قاراماستان بارلىق كاسىپكەرگە قاتىستى. عيمارات يەلەرى، سونداي-اق پيك، ميب، قس سياقتى زاڭدى جانە جەكە تۇلعالار مەن جەر پايدالانۋشىلار اۋماعىنىڭ تازالىعىن قامتاماسىز ەتىپ، عيمارات قاسبەتتەرىنىڭ ۋاقتىلى جوندەلۋى مەن سىرلانۋىن قاداعالاۋعا ءتيىس. سونىمەن قاتار، ولار ەسكەرتكىش تاقتالار، كوشە كورسەتكىشتەرى (تۇيىق كوشەلەر مەن الاڭداردى قوسقاندا)، نومىرلىك بەلگىلەر، ماڭدايشالار مەن اقپاراتتىق تاقتايشالاردىڭ تازالىعىن جانە دۇرىستىعىن ساقتاۋعا مىندەتتى.
قىس مەزگىلىندە عيمارات يەلەرى تۇرعىندار مەن جالعا الۋشىلاردى قار مەن مۇزدى تازالاۋ جۇمىستارى تۋرالى الدىن الا حاباردار ەتۋگە ءتيىس.
تالاپتاردىڭ ورىندالۋىن كىم قاداعالايدى؟
كورىكتەندىرۋ ءتولقۇجاتىنىڭ تالاپتارىنىڭ ورىندالۋىن اۋدان اكىمدىكتەرىنىڭ كورىكتەندىرۋ جانە ەكولوگيا ءبولىمى باقىلايدى.
تالاپتاردى ساقتاماسا نە بولادى؟
تالاپتى بۇزعان كاسىپكەرلەر قازاقستان رەسپۋبليكاسىنىڭ اكىمشىلىك قۇقىق بۇزۋشىلىق تۋرالى كودەكسىنىڭ 505-بابى بويىنشا اكىمشىلىك جاۋاپكەرشىلىككە تارتىلادى. شاعىن بيزنەس سۋبەكتىلەرى مەن كوممەرسيالىق ەمەس ۇيىمدار ءۇشىن ايىپپۇل مولشەرى – 30 اەك. ورتا بيزنەس سۋبەكتىلەرى ءۇشىن – 40 اەك. ءىرى بيزنەس سۋبەكتىلەرى ءۇشىن – 100 اەك.
بيزنەس قالاي تارتىلدى؟
ءتولقۇجاتتاۋ ۇدەرىسى 2024 جىلى كورىكتەندىرۋ ەرەجەلەرىنىڭ جاڭارتىلۋىنان كەيىن باستالدى. بۇل ۇدەرىستى جەدەلدەتۋدە «جاۋاپتى بيزنەس – كورىكتى قالا» باستاماسى ماڭىزدى ءرول اتقاردى. ول «الماتى – ءبىزدىڭ ورتاق ءۇيىمىز» ناۋقانى اياسىندا جۇزەگە اسىرىلدى. اۋدان اكىمدىكتەرىنىڭ كاسىپكەرلىك ءبولىمى بيزنەس يەلەرىمەن كەزدەسىپ، كورىكتەندىرۋ ءتولقۇجاتتارىن ەنگىزۋ جانە تالاپتاردى ورىنداۋ بويىنشا ءتۇسىندىرۋ جۇمىستارىن جۇرگىزدى. ءتولقۇجاتتاۋعا اۋدان اكىمدىگى مەن كاسىپكەرلەر بىرلەسە قول قويدى.
ءتولقۇجاتتاۋ قورىتىندىسى بويىنشا الماتىلىق كاسىپكەرلەر ويىن ايتتى.
«بۇل ءتولقۇجاتقا قول قويعانىمىزعا قاراماستان، ءبىز ءاردايىم دۇرىس كورىكتەندىرۋ تالاپتارىن ۇستانامىز. بىزدە ارنايى قىزمەتكەرلەر بار، ولار اۋماقتى قاداعالاپ وتىرادى. باسقا كومپانيالاردى دا تازالىقتى ساقتاۋعا، اۋماعىن رەتكە كەلتىرۋگە شاقىرامىن، ويتكەنى قالامىزدىڭ تازا ءارى گۇلدەنگەنى بارىمىزگە ماڭىزدى»، – دەدى Sevalo كومپانياسىنىڭ مەنەدجەرى سىرىم ىسقاقوۆ.
«ءتولقۇجاتتى ءتۇسىندىرۋ ايقىن جانە قولجەتىمدى بولدى. ءبىز اۋماعىمىزدى تازا ءارى ۇقىپتى ۇستاۋ ءۇشىن بار كۇشىمىزدى سالۋعا دايىنبىز. الماتى تۇرعىندارىن قالانىڭ تازالىعىن ساقتاۋعا شاقىرامىن»، – دەدى Mega Cars ج ش س كومپانياسىنىڭ وكىلى انتون يۆانوۆ.