تۋعان كۇن يەسىن ايتۋلى كۇنىمەن قۇتتىقتاۋ سالتاناتتى شاراسى راديوەلەكترونيكا جانە بايلانىس اسكەري-ينجەنەرلىك ينستيتۋتىندا ءوتتى.
وعان قارۋلى كۇشتەردىڭ ارداگەرلەرى، الماتى وڭىرلىك گارنيزونىنىڭ قۇرامالارى مەن اسكەري بولىمدەرىنىڭ كومانديرلەرى، اسكەري وقۋ ورىندارىنىڭ پروفەسسور-وقىتۋشىلار قۇرامى، كۋرسانتتارى مەن تاربيەلەنۋشىلەرى قاتىستى، دەپ حابارلايدى Almaty-akshamy.kz قورعانىس مينيسترلىگىنە سىلتەمە جاساپ.
قورعانىس ۆەدومستۆوسى باسشىسىنىڭ اتىنان مەرەيتوي يەسىن ونىڭ ورىنباسارى گەنەرال-لەيتەنانت سۇلتان كامالەتدينوۆ قۇتتىقتادى. ول ايتقالي يسەنعۇلوۆتىڭ جاۋىنگەرلىك داستۇرلەر مەن ۇرپاقتار ساباقتاستىعىن ساقتاۋداعى ءرولىن اتاپ ءوتتى.
«ءسىز ەلىمىزدىڭ قارۋلى كۇشتەرىندەگى تاربيە قۇرىلىمىنىڭ نەگىزىن قالاۋعا اتسالىستىڭىز. ءسىزدىڭ باسشىلىعىڭىزبەن اسكەري ءتارتىپتى ساقتاۋ جونىندە ەلەۋلى جۇمىستار جۇرگىزىلدى، قارۋلى كۇشتەردىڭ تاربيە جانە الەۋمەتتىك-قۇقىقتىق جۇمىس ورگاندارىنىڭ ينستيتۋتى قۇرىلدى، "اسكەري قىزمەتشىلەر مەن ولاردىڭ وتباسى مۇشەلەرىنىڭ مارتەبەسى جانە ولاردى الەۋمەتتىك قورعاۋ تۋرالى" زاڭ ازىرلەندى. ءسىزدى بىلىكتى ازامات، ءوز ءىسىنىڭ كاسىبي مامانى جانە ناعىز گەنەرال رەتىندە بىلەمىز. جاۋاپتى لاۋازىمداردى اتقارا وتىرىپ، ءوزىڭىزدى ساۋاتتى جانە بىلىكتى باسشى رەتىندە كورسەتتىڭىز، سوزبەن دە، ىسپەن دە كەز كەلگەن كۇردەلى ءارى جاۋاپتى تاپسىرمانى اتقارا الاتىنىڭىزدى دالەلدەدىڭىز»، – دەپ اتاپ ءوتتى ول.
گەنەرال-مايور ايتقالي يسەنعۇلوۆ اسكەر قاتارىندا مەرزىمدى قىزمەتتەگى ساربازدان باستاپ گەنەرالعا دەيىنگى مانساپتىق ساتىلاردان ءوتتى. "قۇرمەت بەلگىسى"، "قىزىل جۇلدىز" وردەندەرىمەن ماراپاتتالعان. ول تاۋەلسىز قازاقستان قارۋلى كۇشتەرىنىڭ قالىپتاسۋى مەن دامۋىنا قوسقان ۇلەسى ءۇشىن "قۇرمەت" وردەنىمەن جانە كوپتەگەن مەدالدارمەن ماراپاتتالدى. زەينەتتە بولسا دا، ول قوعامدىق ومىرگە جانە جاستاردى اسكەري-پاتريوتتىق تاربيەلەۋگە بەلسەنە ارالاسىپ ءجۇر. قارۋلى كۇشتەر ارداگەرلەرى ورتالىق كەڭەسى باستىعىنىڭ ورىنباسارى وتستاۆكاداعى گەنەرال-مايور مارات ناعۇمانوۆ ارداگەردىڭ تاۋەلسىز قازاقستاننىڭ اسكەرى مەن تاربيە قۇرىلىمىنىڭ قالىپتاسۋىنا قوسقان ۇلەسىن اتاپ ءوتتى.
ارداگەرمەن كەزدەسۋگە شاقىرىلعان قوناقتار ونىڭ ءومىر جولى جايلى بەينەروليكتى جانە ەكسپوزيسيالىق ماتەريالداردى كوردى. ءىس-شارا ونىڭ قۇرمەتىنە ارنالعان كونسەرتپەن اياقتالدى.