المالى اۋدانىنداعى كوشە-جول جەلىسىنىڭ كەپتەلىس دەڭگەيىن تومەندەتۋ، سونداي-اق كولىك ينفراقۇرىلىمىن دامىتۋ ماقساتىندا ايتەكە بي كوشەسىنىڭ بايتۇرسىنوۆ كوشەسىنەن دوسمۇحامەدوۆ كوشەسىنە دەيىن ۇزارتۋ جۇمىس جۇرگىزىلدى، دەپ حابارلايدى Almaty-akshamy.kz
جول-قۇرىلىس جۇمىستارى ماۋسىم ايىندا باستالىپ، اعىمداعى جىلدىڭ قازان ايىندا اياقتالدى. ۇزارتۋ بويىنشا جۇمىستاردىڭ اياسىندا ۇزىندىعى 142 م، ءجۇرىس بولىگىنىڭ ەنى 11،5 م، ەكى جاعىندا تروتۋارى بار جاڭا جول سالىندى. سونداي-اق، ينجەنەرلىك كوممۋنيكاسيالار قايتا قۇرىلدى جانە سىرتقى جارىقتاندىرۋ ورناتىلدى.
جولداعى قوزعالىس قاۋىپسىزدىگىن قامتاماسىز ەتۋ جانە اپاتتىق جاعدايلاردىڭ الدىن الۋ ماقساتىندا ايتەكە بي كوشەسىنىڭ ۇزارتىلعان بولىگىندە شىعىس باعىتتا كولىكتەر تەك وڭعا بۇرىلا الادى. ال باتىس باعىتتا – تىكە جۇرۋگە، وڭعا جانە سولعا بۇرىلۋ مۇمكىندىگى بار. بۇگىندە اتالعان اۋماقتا ءتيىستى جول تاڭبالارىن سىزۋ جانە جول بەلگىلەرىن ورناتۋ جۇمىستارى اياقتالىپ، قوزعالىس اشىلدى.
