شاراعا كومپوزيتوردىڭ ۇرپاقتارى مەن ونەر قايراتكەرلەرى قاتىستى
الماتىداعى مەملەكەتتىك ورتالىق مۋزەيى قۇرمانعازى اتىنداعى قازاق ۇلتتىق حالىق اسپاپتار وركەسترىمەن بىرىگىپ، قازاق كسر حالىق ءارتيسى، مەملەكەتتىك سىيلىقتاردىڭ لاۋرەاتى، كومپوزيتور، ديريجەر احمەت قۋان ۇلى جۇبانوۆتىڭ تۋعانىنا 117 جىل تولۋىنا ارنالعان سالتاناتتى ءىس-شارا وتكىزدى، دەپ حابارلايدى Almaty-akshamy.kz.
شارا اياسىندا قازاق مۋزىكا ونەرىنىڭ كوشىن العا سۇيرەگەن بىرەگەي تۇلعاعا ارنالعان كورمە ۇيىمداستىرىلىپ، ومىرلىك، شىعارماشىلىق جانە عىلىمي-پەداگوگيكالىق جولىن باياندايتىن قۇندى جادىگەرلەر قويىلدى. ولار ونەر قايراتكەرىنىڭ عىلىمي ەڭبەكتەرى، قولجازبا پارتيتۋرالارى، ماراپاتتارى، جەكە قۇجاتتارى مەن دومبىراسى، فراك جانە ديريجەرلىق تاياقشاسى سىندى ەكسپوناتتار.
سالتاناتتى شارا بارىسىندا قازاقستان رەسپۋبليكاسى مەملەكەتتىك ورتالىق مۋزەيى ديرەكتورىنىڭ ورىنباسارى ساروۆ سەرجان باراحان ۇلى، قۇرمانعازى اتىنداعى قازاق ۇلتتىق حالىق اسپاپتار وركەسترىنىڭ ديرەكتورى قۋانىشيەۆ مەدەت ەرمەكقالي ۇلى، قۇرمانعازى اتىنداعى قازاق ۇلتتىق كونسەرۆاتورياسىنىڭ پروفەسسورى، كومپوزيتور، ق ر ەڭبەك سىڭىرگەن قايراتكەرى دالدەنباي بەيبىت ءابىل ۇلى، قۇرمانعازى اتىنداعى قازاق ۇلتتىق كونسەرۆاتورياسىنىڭ دوسەنتى، PhD دوكتورى بەردىباي ايجان راحمانقۇلوۆالار قۇتتىقتاۋ ءسوز سويلەدى.
كونسەرتتىك باعدارلامادا قۇرمانعازىنىڭ، احمەت جۇبانوۆتىڭ، عازيزا جۇبانوۆانىڭ، مۇرات سىدىقوۆتىڭ، قۋانىش نۇكىشيەۆتىڭ شىعارمالارى جانە قازاق حالىق اندەرى ورىندالدى.
قۇرمانعازى اتىنداعى قازاق ۇلتتىق كونسەرۆاتورياسىنىڭ ۆوكالدىق ونەر كافەدراسىنىڭ ستۋدەنتتەرى، حالىقارالىق بايقاۋلاردىڭ لاۋرەاتتارى ارۋجان الپىسبايەۆا مەن شىڭعىس نۇرعالي ۇلىنىڭ ونەرى دە كوپشىلىكتى ءسۇيسىنتتى.
شاراعا كومپوزيتوردىڭ تۋىستارى، ۇرپاقتارى مەن ونەر قايراتكەرلەرى قاتىستى.