ەلىمىزدىڭ ءبىرقاتار وڭىرىندە قوعام قايراتكەرلەرىنە ەسكەرتكىش ورناتىلادى.
بۇل جايىندا ق ر مادەنيەت جانە سپورت ءمينيسترى داۋرەن ابايەۆ ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«كەشە ۇلتتىق اكادەميالىق كىتاپحانادا مونۋمەنتتىك ونەر قۇرىلىستارىن ورناتۋ جونىندەگى كوميسسيا وتىرىسى ءوتتى. جيىندا مونۋمەنتالدى ونەر سالاسىنداعى ساراپشىلارمەن كوپتەگەن وزەكتى ماسەلەنى تالقىلادىق. وتىرىستا ماقۇلدانعانداي، الداعى ۋاقىتتا قوستاناي وبلىسىنىڭ تورعاي اۋىلىندا الاش قايراتكەرلەرى احمەت بايتۇرسىن ۇلى مەن ءمىرجاقىپ دۋلاتۇلىننىڭ ەسكەرتكىشتەرى بوي كوتەرەدى. سونداي-اق الماتى قالاسىندا احمەت بايتۇرسىنۇلىنا ەسكەرتكىش جانە تەاتر قايراتكەرى جۇمات شانينگە بيۋست ورناتىلادى»، - دەپ جازدى مينيستر Facebook-پاراقشاسىندا.
ونىڭ اتاپ وتۋىنشە، بەلگىلى مۇسىنشىلەر، سۋرەتشىلەر، زەرگەرلەر، عالىمدار مەن قوعام قايراتكەرلەرى قۇرامىنا كىرەتىن مونۋمەنتالدى ونەر قۇرىلىسىن ورناتۋ جونىندەگى كوميسسيا رەسپۋبليكالىق كونكۋرستىڭ قورىتىندىسى بويىنشا جوبالاۋ جۇمىستارىن قاراپ، ءوز پىكىرلەرىن ورتاعا سالدى.
«ەسكەرتكىشتەر – ءبىزدىڭ تاريحي جادىمىزدى جاڭعىرتۋدا جانە قوعامدىق سانانى قالىپتاستىرۋدا ەرەكشە مانگە يە. سوندىقتان جوسپارلاۋدان باستاپ ەسكەرتكىشتەردى ورناتقانعا دەيىنگى جۇمىسقا مۇقيات قاراۋىمىز قاجەت. كوميسسيا توبى مۇسىندەردىڭ جۇمساق ماتەريالدان جاسالعان تولىق كولەمدەگى نۇسقاسىن جان-جاقتى قاراستىرۋى ءتيىس. سونداي-اق، كوميسسيا مۇشەلەرى جامبىل، قاراعاندى، قوستاناي، تۇركىستان جانە ۇلىتاۋ وبلىستارى اكىمدىكتەرىنىڭ يدەيالىق ۇسىنىستارىن ءبىراۋىزدان قولدادى. اتالعان وڭىرلەردە قازاقستاننىڭ حالىق جازۋشىسى شەرحان مۇرتازاعا، اقىن، مەملەكەت جانە قوعام قايراتكەرى كاكىمبەك سالىقوۆقا، نياز باتىر سايدالى بارقىۇلىنا، ەكىنشى دۇنيەجۇزىلىك سوعىس جانە ەڭبەك ارداگەرى جاقسىبەك وڭشىبايەۆقا، سونداي-اق تۇرىك ساياساتكەرى، مەملەكەت قايراتكەرى ادنان مەندەرسكە ارنالعان ەسكەرتكىشتەردى جوبالاۋ جوسپارلانىپ وتىر»، - دەدى داۋرەن ابايەۆ.