بيىل قالادا 350 مىڭعا جۋىق اعاش وتىرعىزۋ جوسپارلانعان
قالا اكىمدىگىنىڭ باستاماسىمەن قولعا الىنعان يگىلىكتى ىسكە قالا تۇرعىندارى مەن جەكەلەگەن كومپانيالار دا اتسالىسۋدا، دەپ حابارلايدى Almaty-akshamy.kz «حابار 24» تەلەارناسىنا سىلتەمە جاساپ.
مەدەۋ اۋدانىنداعى جاڭادان سالىنعان جول ايرىقتىڭ ورتاسىنا 50 ءتۇپ اعاشتى قازاقستان قور بيرجاسىنىڭ ۇجىمى وتىرعىزدى. بۇل ەڭ الدىمەن كوپكە ۇلگى بولاتىن، قالا ەكولوگياسىن جاقسارتۋعا ارنالعان ساۋاپتى ءىس.
«بۇل قالا اكىمدىگىنىڭ يگىلىكتى باستاماسى. بۇعان بارلىق كومپانيالاردى قاتىسۋعا شاقىرامىز. بۇگىن جاڭا جول ايرىق بويىندا 50 ءتۇپ كاتالپا اعاشىن ەكتىك. قالانىڭ وزگە دە اۋداندارىنا كوشەت وتىرعىزامىز. ەكولوگيانى جاقسارتىپ، كورىكتەندىرۋگە بويىنشا ءوز جوبالارىمىزدا دا جۇزەگە اسىرامىز»،-دەيدى قازاقستان قور بيرجاسى باسقارما باسشىسىنىڭ ورىنباسارى اندرەي ساليۋك.
اۋەزوۆ اۋدانىندا جالعاسقان ناۋقانعا قالا تۇرعىندارى بەلسەندى قاتىستى. مۇندا اققايىڭ مەن قاراعان كوشەتتەرى ەگىلدى. شاراعا قاتىسقان بارلىق تۇرعىنعا اعاش كۇتىمى جونىندە مالىمەت جازىلعان اقپاراتتىق پاراقشالار تاراتىلدى.
«الەۋمەتتىك جەلىدە وسى جاسىل ەكونوميكا باسقارماسىنىڭ اكسيالارىن كورىپ، ءوتىنىش جىبەرگەن بولاتىنبىز. وسى ءوتىنىشىمىزدى قابىلداپ، اۋلامىزعا 49 اعاش كوشەتىن بەردى. مىنە، بۇگىن كورشىلەرىمىزبەن شىعىپ، اۋلامىزعا اعاشتاردى وتىرعىزىپ جاتىرمىز. ۇلكەن راحمەت!»،-دەيدى قالا تۇرعىنى گۇلميرا مۇحامانوۆا.
ءبىز قالادا اعاش ەگۋ ناۋقانى بولاتىنى جونىندە الدىن-الا حابارلاعانىمىزدا تۇرعىنداردان وتە كوپ ءوتىنىش ءتۇستى. ءار ءوتىنىش بويىنشا كوشەت ەگىلەتىن ايماقتاردى كورىپ، تاڭداۋ جاسادىق. شارانىڭ ماقساتى دا بۇل ىسكە تۇرعىنداردى تارتۋ بولاتىن. ال ەگىلگەن كوشەت كۇتىمىن، جايقالىپ ءوسۋىن تۇرعىندار قاداعالايتىن بولادى. بۇل ايدا قالا اۋماعىندا ەكى مىڭعا جۋىق ءتۇرلى اعاش ەگىلەدى»،-دەيدى جاسىل ەكونوميكا باسقارماسىنىڭ باسشىسى ناتاليا ليەۆينسكايا.
سونداي-اق ەمەن، تەرەك، شاعان اعاشتارىنىڭ جاس تالدارى سايالى مەن شۇعىلا ىقشاماۋداندارىنا دا وتىرعىزىلدى. بيىل قالادا 350 مىڭعا جۋىق اعاش وتىرعىزۋ جوسپارلانعان. ونىڭ 64 مىڭى كوكتەمدە ەگىلگەن.