الماتىدا «ادام. ءداۋىر. ۋاقىت» اتتى كورمە اشىلدى

تاڭسىق پورترەتتەر گالەرەياسى جىل سايىن جاڭا بەينەلەرمەن تولىقتىرىلۋدا

بۇگىن ق ر  ۇلتتىق كىتاپحاناسىنىڭ 1-قاباتتاعى فويەسىندە قازاقستان رەسپۋبليكاسى سۋرەتشىلەر وداعىنىڭ مۇشەسى، زاماناۋي سۋرەتشى تاڭسىق ءماجيتوۆانىڭ «ادام. ءداۋىر. ۋاقىت» اتتى شىعارماشىلىق كورمەسىنىڭ اشىلۋ سالتاناتى ءوتتى، دەپ حابارلايدى Almaty-akshamy.kz.

ءىس-شارانى قازاقستاننىڭ ەڭبەك سىڭىرگەن قايراتكەرى، مەملەكەتتىك سىيلىقتىڭ لاۋرەاتى، «پاراسات» وردەنىنىڭ يەگەرى، كورنەكتى پروزاشى اسقاروۆ الىبەك اسىلباي ۇلى اشىپ، سماعۇل ەلۋباي، قالي سارسەنباي، ارمان حالبەكوۆ لەنتا قيۋ راسىمىنە قاتىستى.  

تانسىق ءماجيتوۆا ─ ق ر سۋرەتشىلەر وداعىنىڭ مۇشەسى، ادام مەن قوعامنىڭ ءوزارا ءىس-قيمىلىن بەينەلەيتىن قىزىقتى زاماناۋي سۋرەتشى. جيىرما جىلدان استام «ادام. ءداۋىر. ۋاقىت» اتتى جوبامەن اينالىسادى. وسى جوبا ەلدىڭ ساياسي، ەكونوميكالىق، رۋحاني ءومىرىنىڭ ماڭىزدى جاقتارىن اشادى. سۋرەتشى قازاقستاننىڭ كورنەكتى ساياسي قايراتكەرلەرىنىڭ، جازۋشىلارىنىڭ، مەديسينا، عىلىم، مادەنيەت جانە سپورت وكىلدەرىنىڭ پورترەتتىك گالەرەياسىن جاسايدى. ولاردىڭ ىشىندە: ءا.نۇرپەيىسوۆ، ءا.كەكىلبايەۆ، ف.وڭعارسىنوۆا، گ.بەلگەر، د.يسابەكوۆ، و.سۇلەيمەنوۆ، ب.ايۋحانوۆ، ت.اۋباكىروۆ، ج.ۇشكەمپىروۆ، ج.مالىبەكوۆ، يۋ.پيا، ە.حاسانعالييەۆ، ا.ءاشىموۆ سياقتى تۇلعالار بار... شەبەردىڭ الدىنا قويعان مىندەتى – جەكە تۇلعانىڭ ىشكى الەمىن جەتكىزۋ، ىرگەلى سيپاتتارعا باسا نازار اۋدارۋ.

وسى جوبا اياسىنداعى العاشقى كورمە 2011 جىلى ەلوردادا ءوتتى. تاڭسىق پورترەتتەر گالەرەياسى جىل سايىن جاڭا بەينەلەرمەن تولىقتىرىلۋدا. 10 جىلدان كەيىن، 2021 جىلى استانادا، سودان كەيىن قاراعاندىدا 50-گە جۋىق پورترەت كورسەتىلدى.

بۇل جوبا يدەياسىنىڭ اۆتورى: ونەرتانۋشى يۆانينا ناتاليا يۆانوۆنا. ول تانسىقتىڭ پسيحولوگيالىق پورترەتتىڭ شەبەرى رەتىندەگى تالانتىن كورىپ، زامانداس بەينەسىنىڭ تاماشا گالەرەياسىن جاساۋعا يتەرمەلەگەن. ال جوبانىڭ وزگەرمەيتىن كۋراتورى: جازۋشى، پوليگرافيست اسقاروۆ الىبەك اسىلباي ۇلى سۋرەتشىنىڭ ەرەكشە دارىنىن تولىق اشۋعا مۇمكىندىك بەردى.

ادامنىڭ رۋحاني بولمىسىنا ەنە ءبىلۋى - تاڭسىق تالانتىنىڭ ماڭىزدى قىرى.

«ادام. ءداۋىر. ۋاقىت» جوباسى وسى مىڭجىلدىق باسىنداعى قازاقستاننىڭ ولشەۋسىز رۋحاني بايلىعى، بولاشاققا ۇمتىلعان پسيحولوگيالىق پورترەتىنە اينالدى.