قوزعالىستىڭ نەگىزگى مىندەتى - زاڭ قوعامداستىعىنىڭ سايلاۋ ناۋقانىنىڭ بارىسىن قۇقىقتىق مونيتورينگىلەۋ جانە سايلاۋ پروسەسىنە قاتىسۋشىلارعا سايلاۋ زاڭناماسىن قولدانۋ ءتارتىبىن ءتۇسىندىرۋ. شتابقا قازاقستاندا جانە شەتەلدە تانىمال زاڭگەرلەر كىردى.
وڭىرلىك كوممۋنيكاسيالار قىزمەتىنىڭ الاڭىندا «قازاقستان زاڭگەرلەر وداعى» الماتى فيليالىنىڭ ءتوراعاسى باۋىرجان ماقۇلبايەۆتىڭ قاتىسۋىمەن باسپا ءسوز كونفەرەنسياسى ءوتتى. ول سونداي-اق «ءادىل سايلاۋ ءۇشىن» قالالىق شتابىن باسقارادى، دەپ حابارلايدى Almaty-akshamy.kz.
ب. ماقۇلبايەۆتىڭ ايتۋىنشا، ولار سايلاۋ ناۋقانىنىڭ بارىسىن مونيتورينگتەۋ شەڭبەرىندە باق-پەن، ۇكىمەتتىك ەمەس جانە حالىقارالىق ۇيىمدارمەن ءوزارا ءىس-قيمىلدى كۇشەيتۋگە باعىتتالعان.
باۋىرجان ماقۇلبايەۆ الداعى پرەزيدەنتتىك سايلاۋ تاقىرىبى بويىنشا سۇراقتارعا جاۋاپ بەردى. پرەزيدەنتتىككە كانديداتتارعا قويىلاتىن تالاپتار تۋرالى ايتىپ بەردى. سونداي-اق، داۋىس بەرۋگە قاتىسقان سايلاۋشىلاردىڭ 50%-دان استام داۋىسىن جيناعان جانە قايتا داۋىس بەرۋ كەزىندە كوبىرەك داۋىس جيناعان كانديدات رەسپۋبليكا پرەزيدەنتى بولىپ سانالاتىنىن حابارلادى.
«21 قىركۇيەكتە مەملەكەت باسشىسى قاسىم-جومارت توقايەۆ پرەزيدەنتتىڭ كەزەكتەن تىس سايلاۋىن تاعايىنداۋ تۋرالى جارلىققا قول قويدى. سايلاۋ 2022 جىلدىڭ 20 قاراشاسىندا وتەدى. كەزەكتەن تىس پرەزيدەنتتىك سايلاۋ رەسپۋبليكا پرەزيدەنتىنىڭ شەشىمىمەن تاعايىندالادى جانە ولار تاعايىندالعان كۇننەن باستاپ ەكى اي ىشىندە وتكىزىلەدى»، - دەپ ەسكە سالدى وكق سپيكەرى.
باۋىرجان ماقۇلبايەۆ قر-داعى سايلاۋلاردا قالاي باقىلاۋشى بولاتىنى تۋرالى اڭگىمەلەر ايتتى.
«ق ر ازاماتى باقىلاۋشى بولۋ ءۇشىن 18 جاستان اسقان جانە ساياسي پارتيالاردان، وزگە دە قوعامدىق بىرلەستىكتەردەن، كوممەرسيالىق ەمەس ۇيىمداردان باقىلاۋشى وكىلەتتىگى بولۋى كەرەك»، - دەدى سپيكەر.
سونداي-اق، ب.ماقۇلبايەۆ 20 قاراشادا جالپىحالىقتىق داۋىس بەرۋ قورىتىندىسى بويىنشا جەڭىسكە جەتكەن كانديدات 7 جىل مەرزىمگە قازاقستاننىڭ كەلەسى پرەزيدەنتى بولىپ سايلاناتىنىن ايتتى.
سايلاۋ ناۋقانى 2022 جىلعى 21 قازان ساعات 18:00-دە باستالىپ، 2022 جىلعى 19 قاراشا ساعات 00:00-گە دەيىن 28 كۇنگە سوزىلادى. ونىمەن قوسا وزىندىك تالاپتارى بار. 19 قاراشا - ۇنسىزدىك كۇنى بولادى.
«قر-داعى سايلاۋ تۋرالى" زاڭعا سايكەس، سايلاۋ كۇنى جانە ونىڭ الدىنداعى كۇنى كەز كەلگەن سايلاۋ الدىنداعى ۇگىت-ناسيحاتقا تىيىم سالىنادى. سايلاۋ الدىنداعى ۇگىت كانديداتتاردى تىركەۋ مەرزىمى اياقتالعان ساتتەن باستالادى جانە سايلاۋ كۇنىنىڭ الدىنداعى كۇننىڭ جەرگىلىكتى ۋاقىتى بويىنشا ءنول ساعاتتا اياقتالادى.
سايلاۋ قورىتىندىلارى ولار وتكىزىلگەننەن كەيىن جەتى كۇن مەرزىمنەن كەشىكتىرىلمەي شىعارىلاتىن بولادى.