قازاقستاننىڭ حالىق جازۋشىسى، قازاقستاننىڭ ەڭبەك ەرى، كسرو مەملەكەتتىك سىيلىعىنىڭ لاۋرەاتى ءابدىجامىل نۇرپەيىسوۆتىڭ 100 جىلدىعىنا وراي الماتىدا مەموريالدىق تاقتانىڭ سالتاناتتى اشىلۋ ءراسىمى ءوتتى. ەسكەرتكىش تاقتا الەمگە ايگىلى «قان مەن تەر» تاريحي-ريەۆوليۋسيالىق تريلوگياسىنىڭ اۆتورى تۇرعان ءۇيدىڭ قابىرعاسىنا، ياعني تولەبايەۆ كوشەسىندەگى 156 ۇيگە ورناتىلدى.
ءىس-شاراعا تانىمال ادەبيەتشىنىڭ تۋىستارى مەن جاقىندارى شۇعا نۇرپەيىسوۆا، كارىم نۇرپەيىسوۆ، سونداي-اق جازۋشىلار، مەملەكەت جانە قوعام قايراتكەرلەرى، زيالى قاۋىم وكىلدەرى، قالا تۇرعىندارى مەن قوناقتارى قاتىستى.
«ءابدىجامىل نۇرپەيىسوۆ – كوزى تىرىسىندە اتى اڭىزعا اينالعان عاجايىپ جازۋشى. ونىڭ ءومىرى مەن ەڭبەگى – ەرلىك پەن ورلىكتىڭ، پاراساتتىلىق پەن بەكزاتتىقتىڭ، ەڭبەكقورلىق پەن كاسىبي شەبەرلىكتىڭ ۇزدىك ۇلگىسى. ول ادەبيەت پەن وتانعا ادال قىزمەت ەتتى. ءابدىجامىل كارىم ۇلى وتاندىق جانە الەمدىك ادەبيەت تاريحىندا جارقىن ءىز قالدىرىپ، حح عاسىرداعى قازاق مادەنيەتىنىڭ سيمۆولىنا اينالدى»، - دەپ اتاپ ءوتتى سالتاناتتى ءىس-شارا بارىسىندا الماتى قالاسى اكىمىنىڭ ورىنباسارى ازامات قالدىبەكوۆ.
سونداي-اق، بۇگىن الماتىدا بەلگىلى جازۋشىلار، سىنشىلار مەن قوعام قايراتكەرلەرىنىڭ قاتىسۋىمەن «الەم تانىعان ءابدىجامىل» اتتى حالىقارالىق عىلىمي-پراكتيكالىق كونفەرەنسيا ءوتتى، وندا مادەنيەت جانە اقپارات ءمينيسترى ايدا بالايەۆا قۇتتىقتاۋ ءسوز سويلەدى.
سپيكەرلەر قاتارىندا قازاقستان جازۋشىلار وداعىنىڭ ءتوراعاسى مەرەكە قۇلكەنوۆ، تۇركسوي باس حاتشىسى سۇلتان رايەۆ، تۇركى مەملەكەتتەرى جازۋشىلار وداعىنىڭ ءتوراعاسى ۇلىقبەك ەسداۋلەت، جازۋشى جانە كينودراماتۋرگ سماعۇل ەلۋباي، مەملەكەت قايراتكەرى، اقىن، دراماتۋرگ، قازاقستاننىڭ ەڭبەك سىڭىرگەن قايراتكەرى نۇرلان ورازالين، اتى اڭىزعا اينالعان تەاتر جانە كينو اكتەرى، قازاقستاننىڭ ەڭبەك ەرى ءاسانالى ءاشىموۆ جانە باسقا دا كورنەكتى قايراتكەرلەر بولدى.
ءابدىجامىل نۇرپەيىسوۆ 1924 جىلى 22 قازاندا قىزىلوردا وبلىسىندا دۇنيەگە كەلدى. ۇلى وتان سوعىسىنا دا قاتىسقان. ونىڭ ايگىلى «قان مەن تەر» تريلوگياسى الەمنىڭ 30 تىلىنە اۋدارىلدى. ول ءوزىنىڭ ادەبي شىعارمالارىندا ارال تەڭىزىنىڭ ماسەلەلەرىن دە كوتەرگەن بولاتىن. ماسەلەن، ارال تەڭىزىنىڭ اپاتقا ۇشىراۋ حيكاياسى «سوڭعى پارىز» رومان-ديلوگياسىندا سۋرەتتەلدى. ول ەڭبەگى ءۇشىن ادەبيەتشى 2003 جىلى شولوحوۆ سىيلىعىمەن ماراپاتتالعان ەدى.