اباي قۇنانباي ۇلىنىڭ 180 جىلدىعىنا وراي الماتىدا بۇگىن ەرەكشە تاڭ اتتى. تاڭعى ساعات 9-دان باستاپ اباي الاڭى ماڭىندا جۇزدەگەن ادام باس قوسىپ، قالانىڭ باستى كوشەلەرىنىڭ ءبىرى — اباي داڭعىلى بويىندا ۇلكەن سەنبىلىك ۇيىمداستىردى، دەپ حابارلايدى Aqshamnews.kz.
بۇل شارا رەسپۋبليكالىق «تازا قازاقستان» باعدارلاماسى اياسىندا ءوتتى. اباي داڭعىلىنىڭ بويى – الماتىنىڭ جۇرەگى. بەس اۋداندى قيىپ وتەتىن ۇزىندىعى 15 شاقىرىمدىق داڭعىل بۇگىن ەرەكشە تۇرگە ەندى. پيك، ميب، كاسىپكەرلەر مەن قاراپايىم تۇرعىندار بىرىگىپ، قوقىس جيناپ، اينالانى رەتكە كەلتىردى. سەنبىلىك بارىسىندا الاڭدا ءتۇرلى اندەر شىرقالىپ، قاتىسۋشىلار بىرگە ءان ايتىپ، ەرەكشە رۋحاني بىرلىك سەزىمىن باستان كەشتى.
شارانىڭ ماڭىزىنا توقتالعان الماتى قالالىق مادەنيەت باسقارماسىنىڭ باسشىسى عاني مايلىبايەۆ:
– بۇگىن ءبىز بارلىق مەكەمەلەر مەن ۇيىمداردى جۇمىلدىرىپ، اباي الاڭىنا جينالدىق. مۇندا مادەنيەت سالاسىنىڭ قىزمەتكەرلەرى مەن ارتىستەر عانا ەمەس، ءتۇرلى سالا ماماندارى دا بار. ءبىز تەك وسى جەردە عانا ەمەس، اباي داڭعىلى بويىمەن ابىلاي حان كوشەسىنە دەيىن تازالاۋ جۇمىستارىن جۇرگىزىپ جاتىرمىز. جاسىل ايماقتى اباتتاندىرىپ، قوقىستى جيناۋدامىز. بۇل اكسيانىڭ ءبىر رەتتىك شارا بولىپ قالۋىن قالامايمىن. وسىنداي يگى باستامالار ءجيى ۇيىمداستىرىلىپ تۇرسا ەكەن دەيمىن. ءبىزدىڭ باسقارما «تازا قازاقستان» باعدارلاماسىنىڭ ءمانىن جاقسى تۇسىنەدى جانە ءاردايىم بەلسەنە اتسالىسىپ كەلەدى. ءبىز ادەتتە تەك سەنبىلىك كۇندەرى عانا تازالىق جاسايتىنبىز. ال شىن مانىندە ءبىزدىڭ قاراماعىمىزداعى مۋزەيلەر مەن مادەني مەكەمەلەر كۇندەلىكتى نەگىزدە تازالىقپەن اينالىسىپ كەلەدى. قۋانتاتىنى – مۇنداي ءىس-شاراعا تەك مادەنيەت سالاسىنىڭ قىزمەتكەرلەرى عانا ەمەس، قالا تۇرعىندارى دا بەلسەندى قاتىسىپ جاتىر. مەنىڭ ويىمشا، ءاربىر ازامات وسىعان جاۋاپكەرشىلىكپەن قاراپ، تازالىقتى وزىنەن باستاۋى ءتيىس.
ابايدىڭ 180 جىلدىعىنا وراي ءبىز وسى ماڭدى ەرەكشە اتاپ وتكىمىز كەلدى، سوندىقتان سەنبىلىكتى ءدال وسى جەردەن باستاۋدى ءجون كوردىك. الداعى ۋاقىتتا تەك سەنبىلىك ەمەس، مەرەكەلىك ءىس-شارالار دا ۇيىمداستىرىلاتىن بولادى. جىل سوڭىنا دەيىن 117 شارا وتكىزۋدى جوسپارلاپ وتىرمىز، – دەدى ول.
بۇل جولعى سەنبىلىكتىڭ ەرەكشەلىگى – تەك تازالىق جۇمىستارى عانا ەمەس، مادەنيەت پەن ونەردىڭ توعىسۋى بولدى. تانىمال انشىلەر، مەن قوعام بەلسەندىلەرى دە قولىنا سىپىرعىش الىپ، قاتارىمىزدا ءجۇردى.
ەربولات تولەگەن سەنبىلىككە دەگەن كوزقاراسىن بىلاي ءبىلدىردى:
– ءار سەنبى سايىن بولاتىن «تازا قازاقستان» اكسياسىن ءبىز قولدايمىز. بۇگىنگى سەنبىلىكتى اباي داڭعىلىنان باستاپ وتىرمىز. مەنىڭ ونەردە جۇرگەن ارىپتەستەرىم دە وسىندا. بالالارىما دا ۇنەمى سەنبىلىككە قاتىسۋدىڭ ماڭىزىن ايتىپ وتىرامىن. وتكەن سەنبىدە ۇلكەن ۇلىممەن بىرگە قاتىستىم، ءبىراق بۇگىن وقۋىنا بايلانىستى كەلە المادى، – دەدى ول.
ال حالىق سۇيىكتىسى اسحات تارعىن تازالىق پەن ونەردى ۇشتاستىرىپ، ەرەكشە كوڭىل كۇي سىيلادى:
– قالانى تازا ۇستاۋ – ءوزىمىزدىڭ قولىمىزدا. بۇگىن تەك ونەر يەلەرى عانا ەمەس، قاراپايىم تۇرعىندار مەن ءتۇرلى مەكەمەلەردىڭ وكىلدەرى دە اتسالىسىپ جاتىر. ءبىز حالىقپەن بىرگە تازالىق جاساپ قانا قويماي، سۇيىكتى اندەرىمىزدى ورىنداپ، كوڭىل كۇي سىيلايمىز، – دەدى ءانشى.