15-16 ناۋرىز كۇندەرى الماتىدا «ميكروحيرۋرگيا ارقىلى اياق-قولدىڭ تۋا بىتكەن جانە جۇرە پايدا بولعان اقاۋلارىن جەدەل ەمدەۋ» اتتى شەبەرلىك ءدارىسى ءوتتى.
ونى الماتىنىڭ №2 قالالىق بالالار كلينيكالىق اۋرۋحاناسىندا بەلگىلى رەسەيلىك حيرۋرگتار ماكسيم ۆاۆيلوۆ پەن تيمۋر تورنونىڭ بىرىگىپ وتكىزدى. سونىڭ اياسىندا سيرەك كەزدەسەتىن اياق-قول پاتولوگياسى بار 8 قازاقستاندىق بالاعا بىرەگەي وپەراسيا جاسادى، دەپ حابارلايدى Almaty-akshamy.kz.
الماتى №2 قالالىق بالالار كلينيكالىق اۋرۋحاناسىنىڭ ديرەكتورى مارات راباندياروۆتىڭ ايتۋىنشا، ءدارىس اياسىندا 60 بالا تەكسەرىستەن ءوتىپ، ولارعا ەم-دوم تاعايىندالدى، 8 بالاعا وتا جاسالدى.
قونايەۆ قالاسىنىڭ تۇرعىنى 9 جاستاعى اديناعا ءبىر مەزەتتە ەكى دارىگەرلەر بريگاداسى اياققا، قولعا جانە مويىن سۇيەگىنە ءۇش بىردەي وپەراسيا جاسادى. ناۋقاسقا «وڭ جاق گەميپارەز، سەرەبرالدى سال اۋرۋى» دياگنوز قويىلعان.
«بالا جوسپارلى تۇردە قابىلداندى، وتادان 4 كۇن بۇرىن قىز وڭ يىعىمەن قۇلاعان. ولار تۇرعىلىقتى جەرى بويىنشا تراۆماتيكالىق پۋنكتكە جۇگىنىپ، وعان وڭ جاق بۇعاناسىنىڭ ورتاڭعى ۇشتەن ءبىر بولىگىنىڭ جابىق سىنۋى دەگەن دياگنوز قويىلدى. دەزو گيپسى قولدانىلادى. وسىعان بايلانىستى وڭ قولعا وتا جاساۋ ماسەلەسى تۋىندادى. تەكسەرۋدەن كەيىن ەكى دارىگەر توبى ءبىر ۋاقىتتا اياققا، بۇعاناعا، جىلىنشىككە جانە ساۋساققا بىرلەسكەن «سيمۋلتانتتى» وتا جاساۋ تۋرالى شەشىم قابىلدادى: وڭ جاق بۇعانانىڭ جابىق وستەوسينتەزى، شىنتاق جىلىكتىك جۇيكەنىڭ قوزعالتقىش تالشىقتارىنىڭ سەلەكتيۆتى نەيروتومياسى؛ سىڭىرلەردىڭ ترانسپوزيسياسى؛ وڭ جاق اسىقاستى بۋىنىنىڭ ارتروەرەزى، - دەدى الماتى №2 قبكا تراۆماتولوگ دارىگەرى ۇلجان سولتانبەكوۆا.
ءقازىر ادينانىڭ جاعدايى جاقسى، ءتاۋىر بولىپ قالدى.
وسى شەبەرلىك ءدارىسى اياسىندا جاسالعان وپەراسيالاردا كۇردەلى ميكروحيرۋرگيالىق ءتاسىل قولدانىلدى.
«ميكروحيرۋرگتاردىڭ ميسسياسى، وعان بىردەن جۇگىنۋدىڭ قاجەتى جوق، ول باسقا ادىستەر كومەكتەسپەگەن كەزدە قولدانىلادى. جاراقاتتان كەيىن اقاۋلار بار، ولاردىڭ بارلىق ورتوپەدى مەن تراۆماتولوگى كەز كەلگەن تاسىلمەن جابۋعا تىرىسادى، جەرگىلىكتى تىندەرمەن تارتادى، بۇل «بوس تەرى پلاستيكاسى» نەمەسە «قايتالاما جازىلۋ» دەپ اتالادى. ەگەر ەشتەڭە كومەكتەسپەسە، وندا ءسىز بوس تەرى كەسىندىسى ارقىلى ەمدەپ، قان تامىر اينالاسىن تىگۋىڭىز كەرەك. بۇل رەتتە، ەشتەڭەنى جاراقاتتاماۋ دەگەن اۋىر مىندەت تۇر»، - دەدى حيرۋرگ تيمۋر تورنو.