قويىلىم اۆتورى - اقىن باقىت بەدەلحان
ع. مۇسىرەپوۆ اتىنداعى قازاق مەملەكەتتىك اكادەميالىق بالالار مەن جاسوسپىرىمدەر تەاترىندا اقىن، قازاقستان جازۋشىلار وداعى ءتوراعاسىنىڭ ورىنباسارى باقىت بەدەلحاننىڭ “9 گرامم” ينتەللەكتۋالدى پوەتيكالىق دراماسىنىڭ تۇساۋكەسەرى ءوتتى، دەپ حابارلايدى Almaty-akshamy.kz Almaty.tv-گە سىلتەمە جاساپ.
تۋىندىنىڭ رەجيسسەرى جۇلدىزبەك جۇماتاي جانە دىبىسپەن كوركەمدەگەن سازگەر قانات يبراگيموۆ. پوەتيكالىق درامانى قاراساي اۋدانىنىڭ “قاراساي جاستارى” تەاترى ساحنالادى.
“9 گرامم” - وققا بايلانعان الاش ارىستارىنىڭ رۋحىنا ارنالعان تىڭ تۋىندى كورەرمەن كوڭىلىنەن شىقتى.
"كوركەمدىك شىندىق ساحنادا سالتانات قۇرعاندا ويلاندىرماي، توعاندىرماي قويمايدى. ءقازىر ەلدىڭ رۋحىن كورسەتىپ، تەاتردىڭ دەڭگەيىن كورسەتۋ ءۇشىن دراماتۋرگيالىق ءتىل كەرەك. ول قانداي ءتىل؟ ول شەكسپيردىڭ ءتىلى – اق ولەڭ. ساحانادا قازاقتىڭ قاسيەتتى قارا ولەڭى مەن اق ولەڭ سالتانات قۇرۋى كەرەك. سول كەزدە ەلدىڭ نازارى اۋادى، كوڭىلى بۇرىلادى. بۇعان دەيىن ءتورت اۋداندا قويىلىمدى كورەرمەن نازارىنا ۇسىندىق. وسىنداي دايىندىقتان وتكەن تەاتر ۇجىمى الماتىلىقتاردىڭ الدىندا ونەر كورسەتتى"، - دەدى قويىلىم اۆتورى، اقىن باقىت بەدەلحان.
پرەمەرادا قازاقستاننىڭ ەڭبەك ەرى، قازاقستان تەاترلار اسسوسياسياسىنىڭ پرەزيدەنتى، كينو جانە تەاتر اكتەرى، پروفەسسور ءاسانالى ءاشىموۆ “قاراساي جاستارى” تەاترىنا ساتتىلىك تىلەپ، اق باتاسىن بەردى.
ال اۋداندىق حالىق تەاترىنا قولداۋ كورسەتىپ جۇرگەن اقىن باقىت بەدەلحان الماتى قالاسى اكىمدىگىنە العىسىن ءبىلدىردى.