الماتىدا 2023 جىلدىڭ سوڭىنا دەيىن قوزعالىسى شەكتەۋلى ازاماتتار پايدالاناتىن 7،5 مىڭ الەۋمەتتىك نىساننىڭ قولجەتىمدىلىگى باعالانادى، دەپ حابارلايدى Almaty-akshamy.kz
الماتىدا اكىم ەربولات دوسايەۆتىڭ تاپسىرماسى بويىنشا بيىل 2 تامىزدان باستاپ inva.gov.kz جۇيەسىنە دەرەكتەردى ەنگىزە وتىرىپ، الەۋمەتتىك نىسانداردى ءتولقۇجاتتاۋ بويىنشا اۋقىمدى جۇمىس جۇرگىزىلىپ وتىر. «الماتى قالاسىن دامىتۋدىڭ 2025 جىلعا دەيىنگى باعدارلاماسى جانە 2030 جىلعا دەيىنگى ورتا مەرزىمدى پەرسپەكتيۆالار» اياسىندا بارلىعى 75 مىڭ نىساندى ءتولقۇجاتتاۋ جوسپارعا ەنگەن.
ءتولقۇجاتتاۋ – مۇگەدەكتىگى بار ادامداردى بەيىمدەۋ بويىنشا ۇسىنىمدى ازىرلەۋگە قاجەتتى نىساندار مەن ولار كورسەتەتىن قىزمەتتەردىڭ قولجەتىمدىلىك جاي-كۇيىن ەسەپكە الۋ جانە باعالاۋ. وسىلايشا، قولداعى بارلىق دەرەكتەر الەۋمەتتىك ينفراقۇرىلىم نىسانىنىڭ قولجەتىمدىلىك پاسپورتىنا ەنگىزىلەدى.
قالالىق ينكليۋزيۆتى ورتامەن قامتاماسىز ەتۋ جونىندەگى جۇمىس تەتىگى، سونىمەن قاتار، پاسپورتتاۋ جونىندەگى جوسپارلار قالانىڭ اۋداندارى بويىنشا بولىنەدى. نىساندار ءتولقۇجاتىنىڭ نەگىزىندە مۇگەدەكتىگى بار ادامدار ءۇشىن نىساندى ودان ءارى بەيىمدەۋ ءۇشىن سمەتا قالىپتاستىرىلادى.
جوسپارلاردى ءبولۋ اۋدانداردا تۇراتىن مۇگەدەكتىگى بار ادامداردىڭ جانە ينفراقۇرىلىم نىسانىنىڭ سانىن ەسكەرە وتىرىپ جۇزەگە اسىرىلعانىن اتاپ وتەمىز. اۋداندىق اكىمدىكتەر پاسپورتتاۋ جانە inva.gov.kz جۇيەسىنە دەرەكتەردى ودان ءارى ەنگىزۋ ءۇشىن نىسانداردىڭ تىزبەسىن ۇسىندى.
قازىرگى تاڭدا الماتى قالاسى بويىنشا حالىقتىڭ موبيلدىلىگى تومەن توپتارى (مۇگەدەكتىگى بار ادام، زەينەتكەر جانە ت.ب.) ءۇشىن قولجەتىمدىلىكپەن قامتاماسىز ەتىلگەن 4 261 الەۋمەتتىك ينفراقۇرىلىم نىسانى، ونىڭ ىشىندە تولىق قولجەتىمدىلىگى 778 نىسان، ءىشىنارا قولجەتىمدىلىگى – تىرەك-قيمىل اپپاراتى بۇزىلعان ادامدار ءۇشىن 895 نىسان، ەستۋ قابىلەتى بۇزىلعان ادامدار ءۇشىن 1002 نىسان، كورۋ قابىلەتى بۇزىلعان ادامدار ءۇشىن 905 نىسان، ارباعا تاڭىلعان ادامدارعا ارنالعان 895 نىسان. بارلىق اقپارات inva.gov.kz پورتالىنا ەنگىزىلدى.
جەكەمەنشىك نىساندارعا كەلسەك، دەرەكتەر بۇزۋشىلىقتاردى جويۋ تۋرالى نۇسقاما بەرۋ ءۇشىن الماتى قالاسى بويىنشا ەڭبەك جانە الەۋمەتتىك قورعاۋ كوميتەتىنىڭ دەپارتامەنتىنە جىبەرىلەدى (ايىپپۇلدار 120-دان 400 اەك-كە دەيىن نەمەسە 414 مىڭنان 1،4 ملن.تەڭگەگە دەيىن).
بۇعان قوسا، جۇمىسپەن قامتۋ جانە الەۋمەتتىك باعدارلامالار باسقارماسى اۋداندىق اكىمدىكتەرمەن، ەڭبەك دەپارتامەنتىمەن جانە قالا پروكۋراتۋراسىمەن بىرلەسىپ ءتولقۇجاتتاۋ بارىسىندا بەرىلگەن ۇسىنىمداردى تەكسەرۋ بويىنشا مونيتورينگ جۇرگىزەدى.
«مۇگەدەكتىگى بار ادامداردى الەۋمەتتەندىرۋ جانە قوعامعا ءسىڭىسۋ ماسەلەسىنە ەرەكشە ءمان بەرەمىز. ولاردى الەۋمەتتەندىرۋ تەحنيكالىق كومەكشى قۇرالدارمەن جانە وڭالتۋدىڭ الەۋمەتتىك قىزمەتتەرىمەن ۋاقىتىلى ءارى اتاۋلى قامتاماسىز ەتۋ ارقىلى ىسكە اسىرىلادى. ءارى قالادا قاجەتتى بارلىق جايلىلىعى بار ينكليۋزيۆتى ورتا قۇرۋ. بۇگىندە الماتىدا مۇگەدەكتىگى بار 55 مىڭ ادام تۇرادى. ولاردىڭ ىشىندە 2 مىڭ ادام اربانى پايدالانادى، 2،8 مىڭ ادامنىڭ ەستۋ، 5،6 مىڭ ادامنىڭ كورۋ قابىلەتى بۇزىلعان. نىسانداردى بەيىمدەۋ جانە بارلىق وبلىستا ينكليۋزيۆتى ورتا قۇرۋ جۇمىسى جالعاسادى»، - دەدى الماتى قالاسى اكىمىنىڭ ورىنباسارى اسەم ءنۇسىپوۆا.
ايتا كەتەيىك، قالادا ينكليۋزيۆتى قوعام قۇرۋ ءۇشىن «شىڭعا ورلەۋ»، «شكولا نەزاۆيسيموي جيزني»، «تەڭ قوعام» الەۋمەتتىك قولداۋ ورتالىقتارى سياقتى الەۋمەتتىك جوبالار جۇمىس ىستەيدى.