الماتىدا جول-قۇرىلىس جۇمىستارىنىڭ ماۋسىمى باستالدى، ونىڭ بارىسىندا 224 كوشەدە جول جابىنىنا ورتاشا جوندەۋ جۇرگىزۋ جوسپارلانۋدا. جوندەلەتىن جولداردىڭ جالپى ۇزىندىعى 200 كم قۇرايدى، دەپ حابارلايدى اlmaty-akshamy.kz.
اعىمداعى جىلى "قايرات"، "المەرەك"، "العاباس"، "اقجار" جانە "شاڭىراق-1" شاعىناۋداندارىندا 70 كم جاڭا جول سالۋ جوسپارلانۋدا. بۇل جاقسى جانە قاناعاتتانارلىق جاعدايداعى قالا جولدارىنىڭ ۇلەسىن 86%-عا دەيىن جەتكىزۋگە مۇمكىندىك بەرەدى.
بۇگىندە مەردىگەر ۇيىمدار مەن تەحنيكالىق قاداعالاۋ انىقتالىپ، اۋداندىق ماڭىزداعى كوشەلەردە جول جوندەۋ بويىنشا دايىندىق جۇمىستارى جۇرگىزىلۋدە. اۋداندىق ماڭىزى بار 6 كوشەدە – اباي داڭعىلى، "اقساي-2" شاعىناۋدانىنداعى الدانوۆ، اقتوبە، سەمياتوۆ كوشەلەرىندەگى وتپەلى جولدار، ايريحا كوشەسى - جولداردىڭ ۇزىندىعى 5،9 كم، بۇلاردا جوندەۋ جۇمىستارى باستالدى. قالا اكىمىنىڭ تاپسىرماسى بويىنشا ءال-فارابي داڭعىلىن جوندەۋدىڭ ورنىنا "شاڭىراق-1"، "اقبۇلاق" جانە "تاستىبۇلاق" شاعىناۋداندارىنداعى كوشەلەر جوندەلەتىن بولادى.
شااج، ساين، رىسقۇلوۆ، رايىمبەك، سەيفۋللين داڭعىلدارى جانە باسقا دا قالانىڭ كۇرەتامىرلارى بولىپ تابىلاتىن ماگيسترالدى كوشەلەردى جوندەۋ جۇمىستارى وقۋ جىلى اياقتالعاننان كەيىن باستالادى دەپ جوسپارلانۋدا. جوندەۋ جۇمىستارىن اعىمداعى جىلدىڭ 30 تامىزىنا دەيىن اياقتاۋ جوسپارلانۋدا.
Vision Zero تۇجىرىمداماسىنا سايكەس ورتاشا جوندەۋدى جۇرگىزۋ اياسىندا كولىك پەن جاياۋ جۇرگىنشىلەر قوزعالىسىنىڭ قاۋىپسىزدىگىن قامتاماسىز ەتۋ ءۇشىن كوشەلەردە تراپەسيا ءتارىزدى جاساندى كەدەرگىلەردى، قاۋىپسىزدىك قاقپاقتارىن، قاۋىپسىزدىك ارالدارىن ورناتۋ بويىنشا جۇمىستار جۇرگىزىلەتىن بولادى.
سونىمەن قاتار، قالانىڭ كوشە-جول جەلىسىندە اعىمداعى جوندەۋ جۇمىستارى جۇرگىزىلۋدە. جۇمىستارعا 12 بريگادا، ارنايى تەحنيكانىڭ 28 بىرلىگى، 96 قىزمەتكەر جۇمىلدىرىلدى. ماگيسترالدى كوشەلەر مەن اپاتتى ۋچاسكەلەردە جالپى اۋدانى 15 مىڭ شارشى مەتردەن استام شۇڭقىرلاردى جوندەۋ جۇمىستارى جۇرگىزىلدى. جوندەۋ بارىسىندا 257 ليۋك كوتەرىلىپ، 421 مەتر جيەك تەگىستەلدى.
ەسكە سالساق، ەربولات دوسايەۆتىڭ تاپسىرماسى بويىنشا قالادا جول-قۇرىلىس جۇمىستارىنىڭ ساپاسىن باقىلاۋ كۇشەيتىلدى. الماتى اكىمى مەردىگەر ۇيىمدارعا جول ينفراقۇرىلىمىنىڭ قىزمەت ەتۋ مەرزىمىن ۇزارتۋ ءۇشىن جاڭا تەحنولوگيالار مەن بەرىك ماتەريالداردى قولدانۋدى تاپسىردى. جول اكتيۆتەرى ساپاسىنىڭ ۇلتتىق ورتالىعىنا ماگيسترالدىق كوشەلەردەگى عانا ەمەس، اۋداندىق ماڭىزى بار كوشەلەردەگى جۇمىستارعا دا باقىلاۋدى كۇشەيتۋ تاپسىرىلدى.