كول اۋماعى قالا تۇرعىندارىنىڭ جايلى سەرۋەندەۋى ءۇشىن اباتتاندىرىلادى
الماتى اكىمى ەربولات دوسايەۆ تۇركسىب اۋدانىنىڭ تۇرعىندارىمەن جۇمىس ساپارى جانە كەزدەسۋ بارىسىندا اۋەجاي كولىن مەحانيكالىق تازارتۋ بويىنشا دايىندىق جۇمىستارىمەن تانىستى. تازارتۋ 1963 جىلى سۋ قويماسى پايدا بولعاننان بەرى العاش رەت جۇزەگە اسىرىلادى، دەپ حابارلايدى almaty-akshamy.kz
اۋەجاي كولى قالانىڭ تومەنگى بولىگىندە، تۇركسىب اۋدانىندا ورنالاسقان. سۋ قويماسىنىڭ تولىمدىلىعى 1 250 000 تەكشە مەتر، ورتاشا تەرەڭدىگى شامامەن 8 مەتر. كول حالىق اراسىندا تانىمال: سۋ قويماسىنا كۇنىنە مىڭنان استام ادام كەلەدى.
تۇركسىب اۋدانىنىڭ اكىمى باقىتجان اقجاروۆ قالا باسشىسىنا جوباعا سايكەس ءتۇبىن لاي مەن قامىستان مەحانيكالىق تازارتۋ، ءتۇبىن تەرەڭدەتۋ جۇمىستارى جانە ت.ب. جوسپارلانعانىن باياندادى. قازىرگى ۋاقىتتا كولگە زەرتتەۋ جۇرگىزىلدى، جوبا تۇزەتىلۋدە. سۋ ايدىنى تولىق بوساتىلعاننان كەيىن 2024 جىلدىڭ ەكىنشى توقسانىندا ۋچاسكەدە تەحنيكا – 3 شىنجىر تاباندى ەكسكاۆاتور، 1 تيەگىش، 25 ساموسۆال – جانە 35 جۇمىسشىدان تۇراتىن بريگادا جۇمىلدىرىلادى.
رەزەرۆۋاردى مەحانيكالىق تازارتۋ سۋدى تولىعىمەن توگىپ تاستاعاننان كەيىن عانا مۇمكىن بولادى، ول بۇرىن-سوڭدى اۋەجاي كولىندە جاسالماعان.
«مۇنداي نىساندارعا تۇراقتى نەگىزدە قىزمەت كورسەتۋ كەرەك. سۋ قويماسىن جىل سايىن بوساتۋ كەرەك، مەنىڭ بىلۋىمشە، ءار 5 جىل سايىن كوپ فاكتورلى زەرتتەۋلەر جۇرگىزۋ كەرەك. ەڭ باستىسى-ساپالى جۇمىس جۇرگىزۋ»، - دەدى الماتى اكىمى ەربولات دوسايەۆ. قالا باسشىسى كول اۋماعىن كەشەندى اباتتاندىرۋ قاجەتتىگىنە نازار اۋداردى.
قالا اكىمىنىڭ تاپسىرماسى بويىنشا وسى اۋداندا قوعامدىق كەڭىستىك قۇرىلىپ، قوسىمشا كوگالداندىرۋ، جاعالاۋدا دەمالۋ ءۇشىن شامدار مەن كوشە جيھازدارىن ورناتۋ قامتاماسىز ەتىلەدى. جۇمىستار ەليەۆاتور كوشەسى بويىمەن ءسۇيىنباي داڭعىلىنان وردجونيكيدزە كوشەسىنە دەيىن جۇرگىزىلەدى.
ەكولوگيا جانە قورشاعان ورتا باسقارماسىنىڭ باسشىسى سەرىك ادىلبايەۆ كىشى الماتى وزەنى ارناسىنىڭ رىسقۇلوۆ داڭعىلىنان اۋەجاي كولىنە دەيىنگى سۋ قورعاۋ بەلدەۋىن اباتتاندىرۋمەن جەكەلەگەن ۋچاسكەلەرىن رەكونسترۋكسيالاۋ بويىنشا جوبالاۋ-سمەتالىق قۇجاتتامانى ازىرلەۋگە بيۋدجەتتىك ءوتىنىم بەرىلگەنىن حابارلادى.
سونداي-اق، قالا باسشىسىنا كول جاعالاۋلارىن جالعايتىن جاياۋ جۇرگىنشىلەر كوپىرىن سالۋ تۋرالى ۇسىنىس جاسالدى. ەربولات دوسايەۆ باستامانى قولداپ، وسى يدەيانى پىسىقتاۋعا تاپسىرما بەردى.
ەسكە سالساق، الماتى اكىمى ەربولات دوسايەۆتىڭ تاپسىرماسى بويىنشا 2023 جىلى 50 جىلدا العاش رەت سايران كولىنىڭ ءتۇبى تازارىپ، 140 مىڭ تەكشە مەتردەن استام قوقىس پەن لاي شىعارىلعان ەدى. وسىنداي جۇمىستار قاراسۋ كولىندە دە جۇرگىزىلدى.