الماتى قالاسىنىڭ وڭىرلىك كوممۋنيكاسيالار قىزمەتى الاڭىندا الماتى قالاسى سپورت باسقارماسىنىڭ باسشىسى دارحان نۇرحان ۇلىنىڭ قاتىسۋىمەن كەڭەيتىلگەن باسپا ءسوز كونفەرەنسياسى بولىپ ءوتتى.
ونىڭ ايتۋىنشا، 2026 جىلى الماتى قالاسى سپورت باسقارماسى سپورتتىق ينفراقۇرىلىمدى ودان ءارى نىعايتىپ، سپورت نىساندارى قالا تۇرعىندارىنا قولجەتىمدى بولا ءتۇسۋى ءۇشىن بار مۇمكىندىكتى قولعا الىپ جاتىر.
ءقازىر «شۇعىلا» مەن «اۆياتور» دەنە شىنىقتىرۋ-ساۋىقتىرۋ كەشەنى مەملەكەتتىك ساراپتامادان ءساتتى ءوتتى. تاعى ەكى نىسان – «شۇعىلا-2» مەن «قاراسۋ» – جوبالاۋ-سمەتالىق قۇجاتتاماسى ازىرلەنىپ، «اقجار» مەن «سايالى» فوك-تارى مەملەكەتتىك ساراپتامادان ءوتىپ جاتىر. جالپى العاندا، 6 جاڭا دەنە شىنىقتىرۋ-ساۋىقتىرۋ كەشەنىن سالۋ جوسپارلانىپ وتىر.
سونىمەن قاتار 1935 جىلى قۇرىلعان سپورتتاعى دارىندى بالالارعا ارنالعان مامانداندىرىلعان مەكتەپ-ينتەرنات-كوللەدجىنىڭ ورنىنا جاڭا عيمارات سالۋ دا جوسپاردا بار. اتالعان نىساننىڭ جوبالاۋ-سمەتالىق قۇجاتتاماسى ساراپتامادان وتكەن، قۇرىلىس قۇنى 5،1 ملرد تەڭگەنى قۇرايدى.
بۇدان بولەك، قالادا جازعى وليمپيادالىق سپورت تۇرلەرى بويىنشا تولىققاندى وقىپ-جاتتىعۋعا مۇمكىندىك بەرەتىن ءبىرىڭعاي بازا جەتىسپەيدى. وسىعان بايلانىستى اباي – روزىباكييەۆ كوشەسىندەگى سپورتتىق-جاتتىعۋ كەشەنى بازاسىندا سپورتشىلاردى كەشەندى دايارلاۋعا ارنالعان وسى زامانعى سپورت ورتالىعىن قۇرۋ جوسپارلانىپ وتىر. بۇل ورتالىق جاتتىعۋلار مەن جارىستار وتكىزۋگە ارنالعان ۇلكەن حابقا اينالادى.
«اتالعان باستامانىڭ بارلىعى سپورتتى جۇيەلى دامىتۋعا، سپورتشىلار ءۇشىن قولايلى جاعداي جاساپ، قالا تۇرعىندارىن بارىنشا بەلسەندى ءومىر سالتىنا تارتۋعا باعىتتالعان»، – دەپ قورىتىندىلادى دارحان نۇرحان ۇلى.