قالانىڭ كولىك ينفراقۇرىلىمىن دامىتۋعا 13،6 ملرد تەڭگە قاراستىرىلعان
قالانىڭ قوعامدىق كولىك جۇيەسىن دامىتۋ ءۇشىن 50 جاڭا تروللەيبۋس ساتىپ الىنادى. بۇل تۋرالى ەربولات دوسايەۆ جەرگىلىكتى بيۋدجەتتى ناقتىلاۋ جونىندە وتكەن ءماسليحاتتىڭ XXII سەسسياسىندا ايتتى، دەپ حابارلايدى Almaty-akshamy.kz ءتىلشىسى.
ايتۋىنشا، بيۋدجەتكە ەنگىزىلگەن تۇزەتۋلەر ەڭ الدىمەن، الماتى تۇرعىندارىنىڭ تالاپ-تىلەكتەرىن ەسكەرە وتىرىپ، الەۋمەتتىك باسىمدىقتاردى ىسكە اسىرۋعا باعىتتالدى.
«قالانىڭ كولىك ينفراقۇرىلىمىن دامىتۋعا 13،6 ملرد تەڭگە قاراستىرىلعان. جول قوزعالىسى قاۋىپسىزدىگىن قامتاماسىز ەتۋ ءۇشىن (جول بەلگىلەرىن سالۋ) قوسىمشا 500 ملن تەڭگە ءبولىندى. بۇقتىرما-قۇلجا جولايرىعىنىڭ قۇرىلىسىن اياقتاۋعا 2،4 ملرد تەڭگە، جولداردى ورتا جانە اعىمداعى جوندەۋگە 1،7 ملرد تەڭگە بولىنەدى. سونىمەن قاتار، 6،3 ملرد تەڭگە 50 تروللەيبۋس ساتىپ الۋعا باعىتتالادى، بۇل قوعامدىق كولىكپەن قىزمەت كورسەتۋ ساپاسىن ارتتىرۋعا وڭ اسەرىن تيگىزەدى»، - دەدى اكىم.
بۇعان دەيىن حابارلانعانداي، الماتىدا حالىق سانىنىڭ ءوسۋى مەن وقۋشى ورنىنىڭ تاپشىلىعىنا بايلانىستى 5 جاڭا مەكتەپ سالىنباق.
سونداي-اق، قالادا تاۋ بەتكەيىندە قۇرىلىس جۇرگىزۋگە تىيىم سالىندى جانە باسىم بولىگىندە 9 قاباتتان جوعارى عيماراتتار سالىنبايدى.