الماتىداعى جالپىقالالىق سەنبىلىكتە 15 مىڭ تەكشە مەتر قوقىس جينالىپ، 5 مىڭ كوشەت وتىرعىزىلدى، دەپ حابارلايدى Almaty-akshamy.kz
الماتىدا 22 ءساۋىر كۇنى قالا اكىمدىگىنىڭ قولداۋىمەن قوعامدىق ۇيىمدار ۇيىمداستىرعان Almaty Clean & Green كەڭ اۋقىمدى ەكولوگيالىق اكسياسى ءوتتى. قالا اكىمى ەربولات دوسايەۆ ەكى جەردەگى – باۋم توعايى مەن مەدەۋ اۋدانىنداعى ەكواكسياعا قاتىستى. شاھار باسشىسىنىڭ ايتۋىنشا، قورشاعان ورتانى قورعاۋ، تابيعاتتى ايالاۋعا باعىتتالعان مۇنداي اكسيالار مەگاپوليستە جاقسى داستۇرگە اينالۋعا ءتيىس.
جالپىقالالىق سەنبىلىككە 82 مىڭنان استام ادام قاتىسىپ، 5 مىڭ اعاش وتىرعىزىلىپ، 15 مىڭ م3 استام قوقىس جينالدى.
ەكولوگيالىق اكسيانى امباسسادورلار، تانىمال ارتىستەر ءبىراۋىزدان قولدادى.
«كەرەمەت، تاماشا اكسيا! الەمدە ەكولوگيا ماسەلەسى قانشالىقتى وزەكتى ەكەنىن ءبارىمىز بىلەمىز، بۇل سۇيىكتى قالامىز الماتىعا دا قاتىستى. بۇل وتە ماڭىزدى وقيعا، ءبىز Almaty Clean & Green اكسياسىن تال ەگۋدەن باستاعانىمىزعا قۋانىشتىمىن. جاس شىبىقتىڭ جايقالعان اعاشقا اينالارىنا سەنىمىمىز مول»، - دەيدى «دجۋليا» ميۋزيكلىنىڭ ۇجىمىمەن بىرگە اكسياعا قاتىسقان بەلگىلى مۋزىكانت، A'Studio توبىنىڭ پروديۋسەرى بايعالي سەركەبايەۆ.
«سەنبىلىككە بۇگىن تۇرعىندار، ەرىكتىلەر، ارتىستەر قاتىسىپ وتىر. ءبىز جاسىل جەلەكتى ايالاپ ۇستاۋىمىز كەرەك. مەنىڭشە، بۇدان ءبىزدىڭ قالامىز كوركەيەدى. سەنبى كۇنى عانا ەمەس، كۇندەلىكتى ومىردە دە وسىنى ۇستانۋىمىز كەرەك»، - دەدى اقىن مۇراتقان شوقان.
ايتا كەتەيىك، جالپىقالالىق سەنبىلىكتى وتكىزۋگە «Posadiderevo.kz» رقب، ECONETWORK، قازاقستاننىڭ كوگالداندىرۋشىلار قاۋىمداستىعى، «سپورتتىق تۋريستەر دوستاستىعى» قۇ، «Greenup.kz» قق مۇرىندىق بولعان. قوعامدىق ۇيىمدار الەۋمەتتىك جەلىلەردە اكسيانى زاماناۋي فورماتتا وتكىزۋگە شاقىردى.
الماتى اكىمدىگى قاجەتتى قۇرال-جابدىقپەن (قولعاپ، تىرما، كۇرەك، قاپ)، كوشەتپەن قامتاماسىز ەتىپ، اكسياعا قاتىسۋشىلارعا اس-سۋ بەردى. مەرەكەلىك كوڭىل-كۇي جاساۋ ءۇشىن بارلىق اۋماقتا جاتتىعۋ، يوگا، زۋمبا، شەبەرلىك دارىستەرى، فلەشموب ۇيىمداستىرىپ، بايقاۋ وتكىزىپ، جۇلدەلەر بەرىلدى.
ەكوبەلسەندىلەر تۇركسىب، جەتىسۋ جانە مەدەۋ اۋدانىنىندا نەگىزگى ءتورت ورىندى بەلگىلەدى. قوعام بەلسەندىلەرىنىڭ باستاماسىنا اۋداندىڭ اكىمدىكتەر دە اتسالىسىپ، وزدەرىنىڭ اۋماعىندا كوممۋنالدىق قىزمەتپەن بىرلەسىپ، جەرگىلىكتى جەردە سەنبىلىك وتكىزدى. اكسيا بارىسىندا قالانىڭ بارلىق اۋدانىندا 26 اۋماق تازارتىلدى