الماتىداعى راديوەلەكترونيكا جانە بايلانىس اسكەري-ينجەنەرلىك ينستيتۋتىنىڭ كۋرسانتتارى دا ءوز تاڭداۋىن جاسادى.
№143 جابىق سايلاۋ ۋچاسكەسىندە 500-گە جۋىق ادام داۋىس بەردى، دەپ حابارلايدى Almaty-akshamy.kz.
اسكەري وقۋ ورنىنىڭ قابىرعاسىندا 34 كۋرسانت العاش رەت ءوز تاڭداۋىن جاساپ، سايلاۋدا داۋىس بەردى. ولاردىڭ بارلىعى دەرلىك جاقىندا 18-گە تولعاندار. بۇل ينستيتۋت - ورتا ازيا بويىنشا وفيسەر-ينجەنەرلەردى دايىندايتىن جالعىز وقۋ ورنى.
«مەن قازاقستان رەسپۋبليكاسىنىڭ ازاماتى رەتىندە ءوز قۇقىعىمدى پايدالانا وتىرىپ، العاش رەت ەل پرەزيدەنتىن سايلاۋعا قاتىسىپ وتىرمىن. ءوز داۋىسىمدى بەرە وتىرىپ، ەلىمنىڭ وركەندەۋى مەن بولاشاعىنىڭ جارقىن بولۋىنا ۇلەسىمدى قوستىم دەپ ويلايمىن. بۇگىنگى ساياسي ماڭىزى زور شاراعا قاتىسۋ ارقىلى ءبىز، كۋرسانتتار ءوز تاڭداۋىمىزدى جاساپ جاتىرمىز. جانە ايتارىم، سايلاۋعا قاتىسۋ ارقىلى پرەزيدەنتتى عانا تاڭداپ قويمايمىز، بۇل - ءبىزدىڭ كەمەلدى كەلەشەككە جاساعان ناقتى قادامىمىز. سوندىقتان بولاشاق وفيسەر رەتىندە ماڭىزدى ساياسي شاراعا قاتىستىم جانە ءوز تاڭداۋىمدى جاسادىم»، - دەدى 1 كۋرس كۋرسانتى سۇلتان سەرىك ۇلى.