الماتى قالالىق موبيلدىلىك باسقارماسى قىستان كەيىن پايدا بولعان شۇڭقىرلاردى جويۋ بويىنشا قانداي كوشەلەردە جۇمىستار جۇرگىزىلىپ جاتقانىن حابارلادى.
«اقپان ايىنىڭ ورتاسىندا اسفالت-بەتون زاۋىتى مەرزىمىنەن بۇرىن ىسكە قوسىلىپ، -5 گرادۋسقا دەيىنگى تەمپەراتۋرادا اسفالت-بەتون قوسپاسىن نىعىزداۋعا مۇمكىندىك بەرەتىن ەنەرگيا ۇنەمدەيتىن قوسپالارى بار «جىلى اسفالت» شىعاردى. قازىرگى تاڭدا جول-كولىك وقيعاسىنىڭ الدىن الۋ ماقساتىندا 300-دەن استام «قالقىمالى» ليۋك ورناتىلدى. بۇل قۇرىلىم قۇدىقتاردىڭ اينالاسىنداعى اسفالت جابىنىن ساقتاۋعا ارنالعان، ويتكەنى قالقىمالى كورپۋسى بار ليۋكتەر اسفالتپەن بىرگە قوزعالادى. بۇل قۇدىقتاردىڭ دا، ليۋكتەردىڭ دە قىزمەت ەتۋ مەرزىمىن ايتارلىقتاي ۇزارتادى»، – دەدى باسقارما وكىلدەرى.
سونىمەن قاتار، رىسقۇلوۆ، ابىلاي حان، رايىمبەك باتىر، تولە بي ماگيسترالدىق كوشەلەرىنىڭ ۋچاسكەلەرىندە اعىمداعى (شۇڭقىرلى) جوندەۋ جۇمىستارى جۇرگىزىلدى.
«بۇگىنگى تاڭدا جوندەۋ بريگادالارى گوگول كوشەسىندە نازاربايەۆ داڭعىلىنان باستاپ ورتالىق مادەنيەت جانە دەمالىس ساياباعىنا دەيىن جۇمىس ىستەپ جاتىر. ودان كەيىن سەيفۋللين، قونايەۆ، ماقاتايەۆ، نازاربايەۆ، مىڭبايەۆ جانە ت.ب. كوشەلەردە جۇمىس باستالادى»، – دەپ اتاپ ءوتتى باسقارمادا.
سونداي-اق، جاقىن ارادا اۋدان اكىمدىكتەرى كوشە-جول جەلىسىنە اعىمداعى جوندەۋ جۇمىستارىن باستايدى. ءار اۋداندا شامامەن 30 مىڭ شارشى مەتر جول جابىنى جوندەلەدى. جالپى، بيىلعى جاز مەزگىلىندە الماتىدا 300 شاقىرىم جولدىڭ ورتاشا جوندەۋ جۇمىستارى مەن 35 شاقىرىم جاڭا جول قۇرىلىسى جوسپارلانعان.
ايتا كەتەيىك، مەگاپوليس تۇرعىندارى @AlmatyJolybot چات-بوتى (https://t.me/AlmatyJolybot) جانە Almaty_Joly Telegram-ارناسى ارقىلى جولداعى شۇڭقىردى جوندەۋ تۋرالى ءوتىنىش بەرە الادى.
ءوتىنىش بەرۋ ءۇشىن:
* ماتىندىك حابارلاما،
* اقاۋدىڭ فوتو/بەينەماتەريالى،
* مەكەنجايى مەن ناقتى كوورديناتتارى،
* بايلانىس دەرەكتەرىن جولداۋ قاجەت.
كەلىپ تۇسكەن وتىنىشتەر قارالعاننان كەيىن ءار جاعداي بويىنشا ءتيىستى شارالار قابىلدانادى. شاعىمدار مەن ۇسىنىستاردى ءتيىمدى قاراستىرۋ ءۇشىن ولاردى تەك رەسمي ارنالار ارقىلى جىبەرۋ قاجەت. الەۋمەتتىك جەلىلەردەگى ءتۇرلى پابليكتەردە قالدىرىلعان پىكىرلەر اركەز قاراستىرىلا بەرمەيدى.