الماتى قالاسىنىڭ ءبىلىم باسقارماسى حابارلاعانداي، ق ر وقۋ-اعارتۋ مينيسترلىگى مەكتەپتەردى جاڭارتۋ بويىنشا ءبىرىڭعاي جوسپاردى بەكىتتى.
مەدەۋ اۋدانىندا 46 جىل بۇرىن سالىنعان №30 مەكتەپ-گيمنازياسى اشىلعاننان بەرى كۇردەلى جوندەۋدەن وتپەگەن. بۇگىندە رەكونسترۋكسيالاۋ جۇمىستارىن باستاۋ ءۇشىن بارلىق دايىندىق شاراسى اياقتالدى، مەردىگەر كومپانيا تاڭدالدى، دەپ حابارلايدى aqshamnews.kz.
قۇرىلىس-مونتاجداۋ جۇمىستارى وسى جىلدىڭ ناۋرىز ايىندا باستالادى. 2026-2027 وقۋ جىلىنا دەيىن وقۋشىلارعا جايلى جاعداي جاساۋ جوسپارلانىپ وتىر. كۇردەلى جوندەۋ جۇمىستارىن باستاۋ تۋرالى تۇپكىلىكتى شەشىم قابىلداماس بۇرىن بارلىق ءبىلىم بەرۋ ۇدەرىسىنە قاتىسۋشىلار مەن اتا-انالار الدىن الا قۇلاعدار ەتىلەدى.
قازىرگى ۋاقىتتا مەكتەپتە 1067 وقۋشى وقيدى. وقۋ ۇدەرىسى قالىپتى رەجيمدە، ساباقتار ۋاقىتىلى ءوتىپ جاتىر.
11 اقپاندا مەدەۋ اۋدانىنىڭ ءبىلىم ءبولىمى مەن الماتىنىڭ ءبىلىم باسقارماسى وتكىزگەن جالپى مەكتەپتىك اتا-انالار جينالىسىندا مەكتەپتى جاڭارتۋ جوباسى تۋرالى تولىق اقپارات بەرىلدى. اتا-انالار كوكەيدە جۇرگەن سۇراقتار قويىپ، ۇسىنىس بىلدىرە الدى.
وقۋشىلارعا ۇزدىكسىز ءبىلىم بەرۋ ءۇشىن مەكتەپ اكىمشىلىگى مەن ءبىلىم باسقارماسى وقۋشىلاردى مەدەۋ اۋدانىنداعى باسقا ءبىلىم بەرۋ مەكەمەلەرىنە ءبولۋ تۋرالى كەلىسىمگە كەلدى:
· «№77 جالپى ءبىلىم بەرەتىن مەكتەپ» كمم - 414 وقۋشى؛
· «№ 47 جالپى ءبىلىم بەرەتىن مەكتەپ» كمم - 326 وقۋشى؛
· «№56 گيمنازيا» كمم - 210 وقۋشى؛
· «م. مامەتوۆا اتىنداعى «№28 مەكتەپ-ليسەيى» كمم - 117 وقۋشى.
بۇعان قوسا، وقۋشىلاردىڭ قاۋىپسىزدىگىن قامتاماسىز ەتۋ ءۇشىن بارلىق قاجەتتى شارا قابىلداندى: قاجەت بولعان جاعدايدا ولاردى مەكتەپتەرگە اۆتوبۋستارمەن تاسىمالداۋ ۇيىمداستىرىلادى.
№30 مەكتەپ-گيمنازياسىنىڭ جاڭارتۋ جۇمىستارى اياقتالعاننان كەيىن وقۋشىلار زاماناۋي ءارى جايلى وقۋ جاعدايىندا ءبىلىم الادى. جاڭارتۋ جوباسى اياسىندا:
- مەكتەپ عيماراتىنىڭ كۇردەلى جوندەۋى؛
- زاماناۋي پاندىك كابينەتتەرمەن جابدىقتاۋ؛
- مەكتەپ جيھازىن جاڭارتۋ؛
- كىتاپحانا مەن اسحانانى جاڭعىرتۋ؛
- سپورت زالىن قايتا قۇرۋ؛
- قاۋىپسىزدىك جۇيەلەرىن ورناتۋ.