بۇگىن الماتىنىڭ وڭىرلىك كوممۋنيكاسيالار قىزمەتىنىڭ الاڭىندا ۆەيپ اينالىمىنا قارسى كۇرەس شارالارىنا ارنالعان بريفينگ ءوتتى. سپيكەر بولىپ الماتى قالاسى پوليسيا دەپارتامەنتى جەرگىلىكتى پوليسيا قىزمەتى باسقارماسى باسشىسىنىڭ ورىنباسارى ايتان جانامان ۇلى ەلەۋسىزوۆ قاتىستى، دەپ حابارلايدى aqshamnews.kz
بريفينگ بارىسىندا شەگىلمەيتىن تەمەكى ونىمدەرىنىڭ جانە ەلەكتروندىق تۇتىنۋ جۇيەلەرىنىڭ (ۆەيپتەردىڭ) زاڭسىز اينالىمىنىڭ جولىن كەسۋ ءۇشىن مەملەكەت قابىلداعان نەگىزگى قادامدار ايتىلدى.
ەلەۋسىزوۆ جاڭا شارالار قابىلداۋ حالىقتىڭ، اسىرەسە جاستاردىڭ دەنساۋلىعىن تەمەكى ونىمدەرى مەن ەلەكتروندىق تەمەكىنى تۇتىنۋدىڭ جاعىمسىز سالدارلارىنان قورعاۋدا ماڭىزدى قادام بولىپ تابىلاتىنىن اتاپ ءوتتى. ول پوليسيا قىزمەتكەرلەرى ۆەيپتىڭ زاڭسىز اينالىمىنا بايلانىستى قىلمىستاردى انىقتاۋدا جانە تەرگەۋدە شەشۋشى ءرول اتقاراتىنىن جانە بۇل ءۇشىن ولارعا ارنايى ءبىلىم مەن داعدىلار قاجەت ەكەنىن اتاپ ءوتتى.
“2024 جىلدىڭ 20 ماۋسىمىنان باستاپ الماتىدا ۆەيپتەردىڭ زاڭسىز اينالىمى فاكتىلەرى بويىنشا 23 قىلمىستىق ءىس قوزعالدى، ونىڭ 4ء-ۋى سوتتا قارالىپ، شەشىمدەر كۇشىنە ەندى. وسى ىستەر اياسىندا ۆەيپينگكە ارنالعان 24 300-دەن استام قۇرىلعى تاركىلەنىپ، جويىلدى"، - دەدى ايتان ەلەۋسىزوۆ.
سپيكەر ۆەيپ اينالىمىنا بايلانىستى بۇزۋشىلىقتاردىڭ قۇقىقتىق سالدارىن ەگجەي-تەگجەيلى ءتۇسىندىردى. وسى بۇيىمداردى ساتقانى، تاراتقانى، اكەلگەنى جانە وندىرگەنى ءۇشىن ەلەۋلى ايىپپۇلدار مەن قىلمىستىق جاۋاپتىلىق كوزدەلگەن.
"ۆەيپتەردى ساتۋ جانە تاراتۋ 738 مىڭ تەڭگەگە دەيىن ايىپپۇلمەن نەمەسە تۇزەتۋ جۇمىستارىمەن جازالانادى. ولاردى ءوندىرۋ مەن اكەلۋ 7،4 ملن تەڭگەگە دەيىن ايىپپۇل سالۋعا، تۇزەۋ جۇمىستارىنا نەمەسە ەكى جىلعا دەيىن باس بوستاندىعىنان ايىرۋعا اكەپ سوعۋى مۇمكىن. توپتاسىپ جاساعان ءىس – ارەكەتتەر نەمەسە اسا ءىرى تابىس تابۋ سياقتى اسا اۋىر قىلمىستارعا 18،4 ملن تەڭگەگە دەيىن ايىپپۇل سالىنادى نەمەسە مۇلكى تاركىلەنىپ، بەس جىلعا دەيىن باس بوستاندىعىنان ايىرىلۋى مۇمكىن"، - دەپ ءتۇسىندىردى ەلەۋسىزوۆ.
سونداي-اق، ۆەيپتەردىڭ قوعامدىق قاۋىپتىلىگى جانە ولاردىڭ دەنساۋلىققا اسەرى تاقىرىبى كوتەرىلدى. تەمەكى شەگۋدىڭ زيانسىشش بالاماسى دەگەن پىكىر كەڭ تاراعان. دەيتۇرعانمەن، سپيكەر ۆەيپتەردىڭ وكپە مەن جۇرەكتىڭ اۋىر اۋرۋلارىن تۋدىرۋى مۇمكىن ەكەنىن جانە نيكوتينگە تاۋەلدىلىككە ىقپال ەتەتىنىن اتاپ ءوتتى. سونىمەن قاتار، ءبىر قۇرىلعىنى بىرنەشە مارتە قولدانۋ گەپاتيت جانە تۋبەركۋلەز سياقتى ينفەكسيالاردىڭ تارالۋىنا اكەلۋى مۇمكىن.
بريفينگ سوڭىندا ەلەۋسىزوۆ ۆەيپتەردىڭ زاڭسىز اينالىمىنا قارسى كۇرەس پوليسيانىڭ قاتاڭ باقىلاۋىندا ەكەنىن جانە بۇل جۇمىس الماتى تۇرعىندارىنىڭ دەنساۋلىعى مەن قاۋىپسىزدىگىن قورعاۋ ءۇشىن جۇيەلى تۇردە جالعاساتىنىن مالىمدەدى.