25 تامىزدا رەسپۋبليكا سارايىندا الماتى قالاسى پەداگوگتارىنىڭ تامىز فورۋمىنىڭ پلەنارلىق وتىرىسى ءوتتى، دەپ حابارلايدى اlmaty-akshamy.kz.
بيىل فورۋم ونلاين فورماتتا 3 مىڭعا جۋىق پەداگوگ پەن 20 مىڭنان استام ءمۇعالىمدى بىرىكتىردى. فورۋمنىڭ تاقىرىبى: «ءبىلىمدى ۇلت: بىلىمگە ۇمتىلۋ، ەڭبەكسۇيگىشتىك جانە پاتريوتيزم».
فورۋمنىڭ پلەنارلىق وتىرىسىنا الماتى قالاسىنىڭ اكىمى ەربولات دوسايەۆ، وقۋ-اعارتۋ ءمينيسترى اسحات ايماعامبەتوۆ، سينگاپۋر مۇعالىمدەر وداعىنىڭ باس حاتشىسى مايك تيرۋمان، حەلسينكي قالاسى ءبىلىم دەپارتامەنتىنىڭ قىزمەتتەردى دامىتۋ ءبولىمىنىڭ باسشىسى مارە كيللونەن، ءبىلىم بەرۋ سالاسىنداعى قازاقستاندىق جانە شەتەلدىك ساراپشىلار قاتىستى.
وتىرىس بارىسىندا الداعى وقۋ جىلىندا قالا مەكتەپتەرىندە ءبىلىم بەرۋ ساپاسىن ارتتىرۋ جولدارى تالقىلاندى. قالالىق ءبىلىم باسقارماسىنىڭ اقپاراتى بويىنشا، بۇگىندە بارلىق مەملەكەتتىك مەكتەپتەردى شارۋاشىلىق جۇرگىزۋ كاسىپورىندارىنا (شجق) كەزەڭ-كەزەڭىمەن كوشىرۋ جۇرگىزىلۋدە. اعىمداعى جىلى قالانىڭ 210 مەملەكەتتىك مەكتەبىنىڭ 76-سى شارۋاشىلىقتى جۇرگىزۋ تۇرىنە كوشەدى.
وسى وزگەرىستەرگە بايلانىستى مۇعالىمدەردىڭ بىلىكتىلىگىن ارتتىرۋعا ەرەكشە كوڭىل بولىنەدى – پەداگوگتەردى وقىتۋ فورماتى تۇبەگەيلى قايتا قارالدى، ونىڭ اياسىندا ولار ءۇشىن حالىقارالىق تاعىلىمدامانى ۇيىمداستىرۋ جوسپارلانۋدا. جاڭا وقۋ جىلى ىشىندە 50 پەداگوگ قىزمەتكەر فينليانديا مەن ەستونيانىڭ جەتەكشى مەكتەپتەرىندە تاعىلىمدامادان وتەدى. 2023 جىلدان باستاپ مۇعالىمدەردى ينكليۋزيۆتى ءبىلىم بەرۋ بويىنشا وقىتۋدىڭ ارنايى باعدارلاماسى باستالادى. باعدارلاماعا كوللەدج وقىتۋشىلارى دا قاتىسادى.
پلەنارلىق وتىرىستىڭ قورىتىندىسى بويىنشا، وقۋ-اعارتۋ ءمينيسترى اسحات ايماعامبەتوۆ 15 پەداگوگتى ۆەدومستۆولىق ناگرادالارمەن ماراپاتتادى، الماتى قالاسىنىڭ اكىمى ەربولات دوسايەۆ «ءبىلىم-يننوۆاسيا» ليسەيىنىڭ ديرەكتورىنا «ورتا ءبىلىم بەرەتىن ۇزدىك ۇيىم» بايقاۋىنىڭ جەڭىمپازى رەتىندە 48 ملن تەڭگە كولەمىندەگى سەرتيفيكاتتى، سونداي-اق حالىقارالىق وليمپيادالاردىڭ جۇلدەگەرلەرىن دايىنداعان قالانىڭ بەس ۇزدىك مۇعالىمىنە 2021-2022 وقۋ جىلىنىڭ قورىتىندىسى بويىنشا 500 مىڭ تەڭگەدەن اقشالاي سىيلىقتى تابىس ەتتى.
پەداگوگيكالىق قىزمەتكەرلەردىڭ تامىز فورۋمى اياسىندا قالانىڭ ءبىلىم بەرۋ جۇيەسى جۇمىسىنىڭ 11 باعىتى بويىنشا ستەند-كورمە ءوتتى.