الماتىدا قوعامدىق كولىك جۇيەسىن دامىتۋ جانە ەكولوگيالىق احۋالدى جاقسارتۋ اياسىندا قالا اۆتوبۋستارى جاڭارتىلىپ جاتىر. «City Bus» جەكەمەنشىك اۆتوپاركى «Skywell» ماركالى ەلەكتر اۆتوبۋستارىن ساتىپ الدى، دەپ حابارلايدى Aqshamnews.kz ءتىلشىسى. بۇل جونىندە الماتى قالاسىنىڭ موبيلدىلىك باسقارماسى مالىمدەدى.
جولاۋشىلار تاسىمالداۋعا ارنالعان بۇل تومەن ەدەندى، كەڭ سىيىمدىلىقتى ەلەكتر اۆتوبۋستار ءبىر قۋاتپەن 400 شاقىرىمعا دەيىن جۇرە الادى. ولار دىبىسسىز قوزعالادى، بەينەباقىلاۋ كامەرالارى، كونديسيونەر، USB-قۋاتتاعىش پورتتارى، جۇرگىزۋشىنى باقىلاۋ جۇيەسى جانە وزگە دە زاماناۋي جۇيەلەرمەن جابدىقتالعان.
جاڭا اۆتوبۋستار 2025 جىلى 22 ماۋسىمنان باستاپ №19 باعىت بويىنشا، ياعني «نۇركەنت تۇرعىن ءۇي كەشەنى – الماتى كوشەسى» ارالىعىندا جولاۋشى تاسىمالداي باستايدى. سونىمەن قاتار بۇل باعىتتاعى جولعا شىعاتىن اۆتوبۋستار سانى 16-دان 18-گە دەيىن ارتتىرىلماق.
ايتا كەتەرلىگى، 2024 جىلى الماتىنىڭ موبيلدىلىك باسقارماسى 600 گازبەن جۇرەتىن اۆتوبۋس، 112 تروللەيبۋس جانە 100 ەلەكتر اۆتوبۋسىن ساتىپ العان بولاتىن. بۇعان قوسا، قالا ىشىندە 3 جاڭا جانە قالا ماڭىنا 20 باعىت اشىلدى.
2025 جىلى اكىمدىك تاعى 600 گازبەن جۇرەتىن اۆتوبۋس ساتىپ الۋدى كوزدەپ وتىر. ال جەكەمەنشىك تاسىمالداۋشىلار تاعى 118 ەلەكتر اۆتوبۋس ساتىپ الۋدى جوسپارلاعان.