ەسكى ۇيلەر مەن پاتەرلەر ءسۇرىلدى
الماتىدا پايدالانۋ مەرزىمى وتكەن 1427 ەكى قاباتتى ءۇي، ال المالى اۋدانىندا 125 ءۇي، 1286 پاتەر بار. ولاردا ورتا ەسەپپەن 3200-دەن استام ادام تۇرادى.
بۇل تۋرالى وڭىرلىك كوممۋنيكاسيالار قىزمەتىنىڭ بريفينگىندە الماتى قالاسىنىڭ المالى اۋدانى اكىمىنىڭ ورىنباسارى ساپار نۇراشيەۆ ايتتى، دەپ حابارلايدى Almaty-akshamy.kz قازاقپارات-قا سىلتەمە جاساپ.
ساپار نۇراشيەۆتىڭ ايتۋىنشا، اۋداندا 1 395 كوپپاتەرلى تۇرعىن ءۇي بار. ولارعا 206 پاتەر يەلەرىنىڭ تۇتىنۋ كووپەراتيۆى، تۇتىنۋشىلار كووپەراتيۆتەرى نەمەسە تۇرعىن ءۇي-قۇرىلىس كووپەراتيۆتەرى قىزمەت كورسەتەدى. قازىرگى ۋاقىتتا اۋداندا 147 مۇلىك يەلەرى بىرلەستىگى مەن 571 جاي سەرىكتەستىك قۇرىلعان.
«المالى اۋدانىندا «2018-2022 جىلدارى المالى اۋدانىنىڭ اۋماعىنداعى ەسكى ۇيلەردى ءسۇرۋ باعدارلاماسى» اياسىندا سوڭعى 4 جىلدا جالپى اۋدانى 9138 شارشى مەتر بولاتىن 21 ەسكى ءۇي نەمەسە 178 پاتەر ءسۇرىلدى. ولاردىڭ ورنىندا 11 كوپپاتەرلى تۇرعىن ءۇي پايدالانۋعا بەرىلدى.
بۇگىندە تولە بي كوشەسى مەن سەيفۋللين داڭعىلىنىڭ قيىلىسىندا ەكى ءۇي بۇزىلىپ، 2 تۇرعىن ءۇي ۋچاسكەسى مەن 1 اكىمشىلىك عيمارات سالىنۋدا.
شيەۆچەنكو مەن ءشارىپوۆ كوشەلەرىنىڭ قيىلىسىندا قۇرىلىس كومپانياسى ءبىر جەر ءۇي مەن ەكى قاباتتى ءۇيدى بۇزىپ، ورنىنا جاقىن ارادا كوپپاتەرلى تۇرعىن ءۇي سالاتىن بولادى»،- دەدى ساپار نۇراشيەۆ.
ول سونداي-اق جامبىل – بايزاقوۆ – شيەۆچەنكو – ماناس كوشەلەرى كۆادراتىندا ورنالاسقان ەكى قاباتتى 28 تۇرعىن ءۇيدىڭ تۇرعىندارىمەن كەلىسسوزدەر جۇرگىزىلىپ جاتقانىن ءمالىم ەتتى.
«كوشەلەردىڭ وسى الاڭىندا 2 ءۇي ساتىپ الىندى، بۇل 28 ءۇي تۇرعىندارىنىڭ تۇرعىن ءۇي جاعدايلارىن جاقسارتۋ ءۇشىن باستاپقى الاڭ بولادى»، - دەدى سپيكەر.