قۇجاتقا سايكەس، 2025 جىلعا قاراي قولدانىستاعى BRT جەلىسى «شىعىس قاقپاسى» پوليورتالىعىنا دەيىن ۇزارتىلادى. رايىمبەك داڭعىلى بويىمەن جاڭا BRT جەلىسىن ىسكە قوسۋ جوسپاردا. وسىلايشا، جۇردەك اۆتوبۋستار جەلىسى 40 شاقىرىمعا ۇزارادى، دەپ حابارلايدى almaty-akshamy.kz
الماتى قالاسىنىڭ جاڭا باس جوسپارىن ازىرلەۋشى، كولىك ساراپشىسى رومان بارابانوۆتىڭ ايتۋىنشا، ترانزيتتىك-باعدارلانعان دامۋ قاعيداتى (تبد) قوعامدىق كولىكتىڭ قولجەتىمدىلىگىن قامتاماسىز ەتۋگە جانە جەكە اۆتوكولىكپەن ءجۇرۋ قاجەتتىلىگىن ايتارلىقتاي ازايتۋعا مۇمكىندىك بەرەدى.
مەترو، برت، LRT (جەڭىل رەلستى ترامۆاي)، سونداي-اق بولىنگەن جولاقتار قالانىڭ بەلگىلى ءبىر جەرلەرىندە قالالىق جانە اۋداندىق ماڭىزى بار كولىك-اۋىستىرۋ توراپتارىمەن (كات)، جەرگىلىكتى بايلانىستار دەڭگەيىندە ءوزارا بايلانىستى بولادى، سونداي-اق ولارعا مۇمكىندىگىنشە ۆەلوينفراقۇرىلىم (ۆەلوجولدار، ۆەلوجولاقتار) جەتكىزىلەدى. سونىمەن قاتار، كات ءبىرقاتار اۆتوبۋس مارشرۋتتارىن وڭتايلاندىرۋعا مۇمكىندىك بەرەدى»،- دەدى ول.
ساراپشىنىڭ سوزىنشە، تولىققاندى كولىك-اۋىستىرۋ توراپتارى الماتى - 2 ۆوكزالىندا پايدا بولادى. بۇل رايىمبەك باتىر مەترو ستانسياسىن قولجەتىمدى ەتۋگە، قالا ماڭىنداعى اۆتوبۋستاردىڭ باعىتتارىن قونايەۆ قالاسىنا، سونداي-اق قازاقستاننىڭ باسقا قالالارىنا ەلەكتر پويىزىمەن كەتۋگە مۇمكىندىك بەرمەك. سونداي-اق الماتى -1 ۆوكزالىنىڭ جانىندا مەتروعا اۋىسۋعا جاعداي جاسالادى. ال، ۇزارعان جەلىنىڭ ءوزى برت جانە LRT-مەن تۇيىسەتىن بولادى.
سونىمەن قاتار، ساراپشى جەڭىل رەلستى جۇردەك كولىكتەر جوباسى قالاعا كوپتەن بەرى قاجەت ەكەنىن ايتتى.
الداعى ەكى جىلدا قولدانىستاعى BRT جەلىسى «شىعىس قاقپاسى» پوليورتالىعىنا دەيىن ۇزارتىلىپ، رايىمبەك داڭعىلى بويىمەن جاڭا BRT جەلىسى ىسكە قوسىلادى. 2025 جىلى قالقامان مەترو ستانساسى پايدالانۋعا بەرىلىپ، باتىس باعىتتاعى كەلەسى ءۇش ستانسانىڭ قۇرىلىسى باستالادى. 2027 جىلعا قاراي تولە بي كوشەسىنىڭ بويىندا جۇردەك جەڭىل رەلستى جولدىڭ ءبىرىنشى جەلىسىن ىسكە قوسۋ جوسپاردا.
2030 جىلعا قاراي BRT جەلىلەرىن تىلەندييەۆ، روزىباقييەۆ، مۇقانوۆ، جۇمابايەۆ كوشەلەرى مەن ۇلكەن الماتى اينالما جانە قۇلجا تاسجولى بويىمەن 30 شاقىرىمعا دەيىن ۇزارتۋ جوسپاردا. 2035 جىلعا قاراي – وتەگەن باتىر، تاتىبەكوۆ، سولتۇستىك اينالما جانە شولوحوۆ كوشەسىنىڭ بولىكتەرى قامتىلماق ( 20 شاقىرىم).
ال 2040 جىلى جۇردەك اۆتوبۋستار جەلىسى تاعى 12 شاقىرىمعا ۇزارتىلادى.
جىلدام اۆتوبۋس (BRT) جەلىلەرى جوباسىمەن قاتار مەترو جەلىسى دە داميدى. باس جوسپار بويىنشا 2040 جىلعا قاراي مەترو جەلىسىنىڭ ۇزىندىعى 32 شاقىرىمعا جەتپەك. بۇگىنگى تاڭدا قولدانىستاعى جەلى 13 شاقىرىمدى الىپ جاتىر. مۇنىڭ بارلىعى قوعامدىق كولىكتىڭ قولجەتىمدىلىگىن قامتاماسىز ەتۋگە جانە جەكە كولىكپەن ءجۇرۋ قاجەتتىلىگىن ايتارلىقتاي ازايتۋعا مۇمكىندىك بەرەدى. ءقازىردىڭ وزىندە ارنايى جولاقتاردىڭ كومەگىمەن جاعدايدى جاقسارتۋعا مۇمكىندىك بار.