سوڭعى 2 جىلدا جەكە ينۆەستورلاردىڭ قاراجاتىن تارتۋ ەسەبىنەن قازاقستاننىڭ ۇلتتىق پاركتەرى مەن باسقا دا تابيعي ورىندارىندا 7 ۆيزيت-ورتالىق سالىنىپ، قولدانىسقا بەرىلدى. بۇل ايۋساي، تۇرگەنساي، سارتاس، شارىن، گورەلنيك، مەدەۋ جانە Altynemel ۆيزيت-ورتالىقتارى، دەپ حابارلايدى Almaty-akshamy.kz.
«ەرتىساي ۆيزيت-ورتالىعى - وسىنداي العاشقى نىسان. حالىق اراسىندا ۇلتتىق ساياباقتاردا كەلۋشىلەرگە ارنالعان ورتالىقتار سالۋدىڭ ەكولوگيالىق تيىمدىلىگىنە الاڭداۋشىلىق بىلدىرەتىندەر بار. ءبىراق مۇنداي نىساندار اعاش كونسترۋكسيالاردان جينالعان مودۋلدەردەن تۇراتىن شاعىن قۇرىلىس سانالادى. نەگىزى بەتون قولدانىلماي، مەتالل بايلاماسى بار گەوبۇراندالاردان جاسالادى»،- دەدى مادەنيەت جانە سپورت ۆيسە-مينيسترى ەرجان ەركىنبايەۆ.
جاقىن ارادا تۇرگەن جانە بۋتاكوۆكا شاتقالدارىندا دا ۆيزيت-ورتالىق پايدا بولادى.
ايتا كەتەيىك، بۇگىندە قازاقستاندا تۋريزم سالاسىنداعى كاسىپكەرلەردى مەملەكەتتىك قولداۋدىڭ 7 تەتىگى بار. اتاپ ايتقاندا: ءاربىر شەتەلدىك تۋريست ءۇشىن تۋروپەراتورلاردىڭ شىعىندارىن سۋبسيديالاۋ، بالالار ءۇشىن قازاقستان بويىنشا اۆيابيلەتتەردىڭ قۇنىن سۋبسيديالاۋ، كاسىپكەرلەرگە تاۋ-شاڭعى كۋرورتتارىنىڭ جابدىقتارىن، كولىك قۇرالدارىن ساتىپ الۋ (25%)، جول بويىنداعى سەرۆيس نىساندارىن سالۋ، تۋريستىك نىسانداردى سالۋ جانە رەكونسترۋكسيالاۋ (10%) شىعىنداردىڭ ءبىر بولىگىن وتەۋ، سونداي-اق سانيتارلىق-گيگيەنالىق توراپتاردى ۇستاۋعا ارنالعان سۋبسيديالار جاتادى (ايىنا 83 300 تەڭگە).