الماتى قالالىق ءماسليحاتىنىڭ XXXIX سەسسياسىندا 2026 جىلدىڭ بيۋدجەت جوباسى قارالدى. جوبا جونىندەگى نەگىزگى باياندامانى ەكونوميكا جانە قارجى باسقارماسىنىڭ باسشىسى باۋىرجان قۇدايبەرگەنوۆ جاسادى. بيۋدجەتتىڭ جالپى كولەمى 2،8 ترلن تەڭگە، ونىڭ 2،5 ترلن تەڭگەسى قالانىڭ وزىندىك كىرىستەر ەسەبىنەن قالىپتاسادى.
شىعىس قۇرىلىمىن تالداۋ ناتيجەسىندە دامۋ بيۋدجەتىنىڭ ۇلەسى 30،4%-عا دەيىن ۇلعايىپ، اكىمشىلىك شىعىندار 42،2%-عا دەيىن قىسقاردى. سونىمەن قاتار، الەۋمەتتىك مىندەتتەمەلەر تولىق كولەمدە ساقتالىپ، 700 ملرد تەڭگە دەڭگەيىندە قالدى.
بيۋدجەتتىڭ باسىم باعىتى – كولىك جانە ينجەنەرلىك ينفراقۇرىلىمدى جاڭعىرتۋ. كولىك جۇيەسىن جەتىلدىرۋگە 504 ملرد تەڭگە ءبولىنىپ وتىر. بۇل سوماعا BRT جانە LRT جەلىسىن دامىتۋ، سونداي-اق، وزگە دە قوعامدىق كولىك تۇرلەرىن ەنگىزۋ جوباسى كىرەدى. سۋمەن قامتۋ، سۋ بۇرۋ مەن كوللەكتورلاردى جاڭارتۋ سىندى ينجەنەرلىك جەلىلەردى جاڭارتۋ ماقساتىندا شامامەن 400 ملرد تەڭگە قاراستىرىلعان. شاھاردى كورىكتەندىرۋگە 270 ملرد تەڭگە ءبولىنىپ، ونىڭ اياسىندا «حالىق قاتىساتىن بيۋدجەت» باعدارلاماسىنىڭ جوبالارى مەن كوگالداندىرۋ جۇمىستارى جۇزەگە اسىرىلماق.
الەۋمەتتىك سالا دا وزەكتىلىگىن جويمايدى. ءبىلىم بەرۋ جۇيەسىنە 487،2 ملرد تەڭگە، دەنساۋلىق ساقتاۋ سالاسىنا 88،2 ملرد تەڭگە بولىنەدى. بۇل قارجى امبۋلاتوريالار سالۋ مەن مەديسينا ۇيىمدارىن جابدىقتاۋعا باعىتتالادى.تۇرعىنداردى الەۋمەتتىك قولداۋعا 149،9 ملرد تەڭگە قاراستىرىلعان.
شامامەن 110 ملرد تەڭگە مادەنيەت پەن سپورتقا بولىنگەن، وعان نىسانداردى قايتا جاڭعىرتۋ جانە جاڭا ستاديون قۇرىلىسىن باستاۋ كىرەدى.
قالانىڭ باس قارجىگەرىنىڭ ايتۋىنشا، ۇسىنىلعان بيۋدجەت جوباسى مەگاپوليستىڭ تۇراقتى دامۋىنا، ينفراقۇرىلىمدى جاڭعىرتۋعا جانە الماتىلىقتاردىڭ ءومىر ءسۇرۋ ساپاسىن ارتتىرۋعا باعىتتالعان.