2025 جىلى الماتى قالاسىنىڭ اۋماعىندا ءۇش دەڭگەيلى كوگالداندىرۋ بويىنشا اۋقىمدى جۇمىس باستالادى. ءبىرىنشى دەڭگەيدە كوگالدار مەن گۇلزارلار، ەكىنشى دەڭگەيدە بۇتالار مەن ساندىك وسىمدىكتەر، ال ءۇشىنشى دەڭگەيدە ءىرى اعاشتار وتىرعىزىلادى.
2025–2027 جىلدارعا ارنالعان ءتيىستى بيۋدجەت جوباسى الداعى ءماسليحات سەسسياسىندا قارالادى. بۇل تۋرالى قالالىق ءماسليحاتتىڭ باسپا ءسوز قىزمەتى حابارلادى.
جالپى، شامامەن 17 مىڭ ءىرى اعاش وتىرعىزۋ جوسپارلانعان، ونىڭ ىشىندە 15 مىڭ اعاشتىڭ بيىكتىگى 4 مەتردەن اسسا، 2 مىڭ اعاشتىڭ بيىكتىگى 6 مەتردەن اسادى.
وتىرعىزۋ جۇمىستارى ماگيسترالدى كوشەلەر بويىندا، ساياباقتاردا، سكۆەرلەردە، بۋلۆارلاردا جانە باسقا دا قوعامدىق ورىنداردا جۇرگىزىلەدى. مۇنداي ءتاسىل تىعىز قونىستانعان اۋدانداردا كولەڭكە مەن جاسىل ايماقتاردى تەزىرەك قۇرۋعا مۇمكىندىك بەرەدى.
جوبا اياسىندا اعاشتاردى وتىرعىزۋ مەن كۇتىپ-باپتاۋدىڭ زاماناۋي ادىستەرى قولدانىلاتىن بولادى. وتىرعىزۋدان كەيىنگى العاشقى ەكى جىلدا جۇيەلى كۇتىم جاسالادى: تامشىلاتىپ سۋارۋ، اۆتوماتتاندىرىلعان سۋارۋ جۇيەلەرىن ورناتۋ، سونداي-اق اعاشتار مەن بۇتالاردى جەرگىلىكتى جاعدايلارعا بەيىمدەلگەن مينەرالدى تىڭايتقىشتارمەن قورەكتەندىرۋ قاراستىرىلعان. بۇل ولاردىڭ جەرسىنۋىن جەدەلدەتەدى.
كوگالداندىرۋ ەكولوگيالىق جاعدايدى جاقسارتۋعا جانە قالالىق ورتانىڭ ساپاسىن ارتتىرۋعا باعىتتالعان. ءىرى اعاشتاردى وتىرعىزۋ جاسىل ينفراقۇرىلىمدى قالىپتاستىرۋ ۋاقىتىن قىسقارتىپ، قالا تۇرعىندارى ءۇشىن جايلى جاعداي جاسايدى.