2024 جىلى الماتى قالاسىندا جوعارى تەحنولوگيالى مەديسينالىق كومەك كورسەتۋگە رەكوردتىق دەڭگەيدە قارجى ءبولىندى.
الماتى تۇرعىندارى مىندەتتى الەۋمەتتىك مەديسينالىق ساقتاندىرۋ (ءمامس) جۇيەسى اياسىندا ەڭ زاماناۋي ءارى قىمبات وتا تۇرلەرىن تەگىن الۋ مۇمكىندىگىنە يە بولدى. بۇل تۋرالى وڭىرلىك كوممۋنيكاسيالار قىزمەتىندەگى باسپا ءسوز كونفەرەنسياسىندا مەديسينالىق ساقتاندىرۋ قورىنىڭ الماتى قالالىق فيليالىنىڭ ديرەكتورى ءىلياس مۇحامەدجان مالىمدەدى، دەپ حابارلايدى aqshamnews.kz.
«2024 جىلى الماتى قالاسىندا تەك كارديوحيرۋرگيالىق وتالارعا 18،6 ملرد تەڭگە باعىتتالدى. بارلىعى 6805 وتا جاسالدى، ونىڭ ءارقايسىسىنىڭ ورتاشا قۇنى — 2،7 ملن تەڭگە»، — دەدى ءىلياس مۇحامەدجان.
سونىمەن قاتار، قالادا 8 ملرد تەڭگەگە 4521 نەيروحيرۋرگيالىق وتا، 7 ملرد تەڭگەگە جامباس جانە تىزە بۋىندارىن اۋىستىرۋ بويىنشا 4593 وتا جۇرگىزىلگەن. سونداي-اق، نەيرو-قان تامىر جانە قان-تامىر جۇيەسىنە جاسالعان 5 045 وتاعا قور 6،7 ملرد تەڭگە تولەدى. سونىمەن قاتار، جالپى قۇنى 709،7 ملن تەڭگەلىك 107 باۋىر مەن بۇيرەك الماستىرىلدى.
«ەگەر قىمبات وتا تۇرلەرى تۋرالى ايتساق، ساقتاندىرىلماعان ازاماتتارعا مۇنداي مەديسينالىق كومەك بىرنەشە ميلليون تەڭگەگە ءتۇسۋى مۇمكىن. ولاردىڭ قۇنى ادامنىڭ تولەگەن جارناسىنا بايلانىستى ەمەس. ءمامس جۇيەسىنىڭ الەۋمەتتىك ماڭىزدىلىعى وسىندا»، — دەپ اتاپ ءوتتى ءىلياس مۇحامەدجان.
ونىڭ ايتۋىنشا، ەڭ قىمبات وتالاردىڭ قاتارىنا جۇرەككە قوسىمشا قولداۋ كورسەتەتىن قۇرىلعىنى ورناتۋ (77،5 ملن تەڭگە)، جۇرەكتىڭ ميترالدى قاقپاقشاسىن الماستىرۋ (17 ملن تەڭگە) جانە اللوگەندى گەموپوەتيكالىق ءدىڭ جاسۋشالارىن الماستىرۋ (16،9 ملن تەڭگە) كىرەدى. بۇل وتا تۇرلەرىنىڭ بارلىعى ءمامس جۇيەسى ارقىلى قارجىلاندىرىلدى.