بۇگىندە الماتىدا قالا اكىمى ەربولات دوسايەۆتىڭ تاپسىرماسى بويىنشا قولعا الىنعان «ينۆاتاكسي» قىزمەتىن ايىنا 2 مىڭنان استام ادام پايدالانادى، ونىڭ 800ء-ى ەرەكشە قاجەتتىلىكتەرى بار بالالار.
وتكەن جىلمەن سالىستىرعاندا بۇل قىزمەتتى پايدالاناتىندار سانى 200 ادامعا ءوستى. بۇل تۋرالى الماتى قالاسى اكىمىنىڭ ورىنباسارى اسەم ءنۇسىپوۆا ينكليۋزيۆتى ورتانى دامىتۋ جونىندەگى كەڭەستىڭ ءبىرىنشى وتىرىسىندا حابارلادى.
2023 جىلدىڭ قورىتىندىسى بويىنشا ينۆاتاكسي قىزمەتتەرىن ۇسىنۋ بويىنشا پيلوتتىق جوبا قولعا الىنعان كەزدە اۆتوموبيلدەر سانى 64-تەن 100-گە دەيىن ۇلعايتىلدى. اسەم ءنۇسىپوۆانىڭ ايتۋىنشا، مۇنداي شارا ارنايى كولىكتەردىڭ جۇكتەمەسىن ازايتۋعا مۇمكىندىك بەردى.
قالا باسشىسىنىڭ ورىنباسارى الماتى اكىمدىگى ق ر ەڭبەك جانە الەۋمەتتىك قورعاۋ مينيسترلىگىنە اگرەگاتورلار بولىگىندە ينۆاتاكسي قىزمەتتەرىن ۇسىنۋ قاعيدالارىنا وزگەرىستەر ەنگىزۋ تۋرالى باستاماشىلىق حات جولدانعانىن ايتتى.
«قازىرگى ۋاقىتتا تاكسي اگرەگاتورلارىنىڭ الەۋمەتتىك قىزمەتتەر پورتالى ارقىلى جىبەرىلگەن قىزمەتتەردى ۇسىنۋى مۇمكىن ەمەس، وسىعان بايلانىستى قولدانىستاعى الەۋمەتتىك تاپسىرىستار ارقىلى قىزمەتتەردى ۇسىنۋدى قوسىمشا پىسىقتاۋعا تۋرا كەلەدى»، - دەپ ناقتىلادى اسەم ءنۇسىپوۆا.