اسكەري قىزمەتشىلەر اراسىندا "اسكەر بارىسى" تيتۋلىنا قازاق كۇرەسىنەن وتكەن IX جابىق تۋرنير اياقتالدى. جارىس ق ر قورعانىس مينيسترلىگىنىڭ سپورت كوميتەتى – ورتالىق سپورت كلۋبىنىڭ بازاسىندا ءوتتى.
ەڭ مىقتى بالۋان اتاعى ءۇشىن قارۋلى كۇشتەر، ۇقك شەكارا قىزمەتى، ۇلتتىق ۇلان، تجم اتىنان قاتىسقان 19 سپورتشى جانە "جاس سارباز" قوزعالىسىنىڭ 18 مىقتىسى سىنعا ءتۇستى، دەپ حابارلايدى Almaty-akshamy.kz.
جارىستىڭ قۇرمەتتى قوناقتارى قازاق كۇرەسى ۇلتتىق قاۋىمداستىعىنىڭ العاشقى پرەزيدەنتى قازاقستاننىڭ ەڭبەك سىڭىرگەن جاتتىقتىرۋشىسى پروفەسسور ەرعالي مۇحيددين ۇلى مەن "قازاقستان بارىسى" ءتۋرنيرىنىڭ ءبىرىنشى جەڭىمپازى ۇلان رىسقۇل.
تۋرنير جەڭىمپازدارىن ق ر قورعانىس مينيسترلىگى سپورت كوميتەتىنىڭ ءتوراعاسى پولكوۆنيك ارمان ابەۋوۆ قۇتتىقتادى.
«بيىل العاش رەت "جاس سارباز" بالالار-جاسوسپىرىمدەر قوزعالىسىنىڭ تاربيەلەنۋشىلەرى اراسىندا وتەتىن تۋرنير اياسىندا داستۇرلەر مەن ۇرپاقتار ساباقتاستىعىن نىعايتۋ ماقساتىندا جارىستار وتكىزدىك. جىل سايىن قازاق كۇرەسى جاستار اراسىندا تانىمال بولىپ كەلە جاتقانى ءبىزدى قۋانتادى»، – دەدى ول.
جارىس قورىتىندىسى بويىنشا ءبىرىنشى جانە ەكىنشى ورىنداردى ورتالىق سپورت كلۋبىنىڭ سپورتشىلارى سەرجانت ءادىل ورازبايەۆ پەن اعا لەيتەنانت مارات بايقامۇروۆ جەڭىپ الدى. ءۇشىنشى ورىن ۇلتتىق ۇلاننىڭ 5573 اسكەري ءبولىمىنىڭ اسكەري قىزمەتشىسى سەرجانت بەكزات التىبايەۆقا بەرىلدى.
دەسانتتىق-شابۋىلداۋ اسكەرلەرى جانىنداعى اسكەري-پاتريوتتىق كلۋبتىڭ تاربيەلەنۋشىسى نۇرسەيىت ساحىباي "جاس سارباز بارىسى – 2024" رەسپۋبليكالىق ءتۋرنيرىنىڭ جەڭىمپازى اتاندى. كۇمىس جۇلدە اسكەري-پاتريوتتىق كلۋبتىڭ تاربيەلەنۋشىسى سەرىكقالي ساعياتقا، قولا – اۋە قورعانىسى كۇشتەرى جانىنداعى اسكەري-پاتريوتتىق كلۋبتىڭ تاربيەلەنۋشىسى ءابىش ءابىلقايىرعا بۇيىردى.
قازىلار القاسىنىڭ شەشىمى بويىنشا التىن بەلبەۋ يەگەرى سەرجانت ءادىل ورازبايەۆ بەدەلدى "قازاقستان بارىسى" رەسپۋبليكالىق تۋرنيرىندە قارۋلى كۇشتەردىڭ نامىسىن قورعايتىن بولادى. الدا ول ەلدىڭ ەڭ مىقتى بالۋانى اتاعى ءۇشىن باعى مەن بابىن سىناپ كورەدى.
ەستەرىڭىزگە سالا كەتەيىك، 2023 جىلى "اسكەر بارىسى" ءتۋرنيرىنىڭ جەڭىمپازى ارميا سپورتشىسى مارات بايقامۇروۆ بولدى.