الماتىنىڭ جىلۋ ەنەرگەتيكالىق كەشەنىندە ينجەنەرلىك جەلىلەر مەن جابدىقتاردىڭ توزۋ دەڭگەيىنىڭ تومەندەۋى بايقالادى.
الدىن الا ەسەپتەۋلەر بويىنشا اعىمداعى جىلى الماتى اكىمى ەربولات دوسايەۆتىڭ تاپسىرماسى بويىنشا جۇرگىزىلگەن جىلۋمەن جابدىقتاۋ سالاسىنداعى كەزەكتى مودەرنيزاسيالاۋ ءوزىنىڭ 25 جىلدىق قىزمەت مەرزىمىن وتەگەن قۇبىر جەلىلەرىنىڭ پايىزىن 59،2%-عا دەيىن قىسقارتۋعا مۇمكىندىك بەردى.
جىلۋ ارالىق كەزەڭدە جالپى ۇزىندىعى 7،6 كم جىلۋ جەلىلەرىندەگى 12 نىسان رەكونسترۋكسيالاندى.
جىلۋ ءوندىرۋ سەكتورىندا بارلىق 84 قازاندىقتا جوندەۋ-پروفيلاكتيكالىق جانە رەكونسترۋكسيالاۋ جۇمىستارى جۇرگىزىلدى. اتاپ ايتقاندا، 7 جىلۋ نىسانىنىڭ 13 قازاندىعى، 12 قازاندىقتىڭ 24 ءتۇتىن سورعىشى، سونداي — اق باسقا دا قوسالقى جابدىقتار اۋىستىرىلدى.
مودەرنيزاسيالاۋ اياسىندا «يۋجنايا» اۋداندىق قازاندىعىنىڭ وندىرىستىك قۋاتى 1،5 ەسە، ال «پرەمەر» قازاندىعىنىڭ وندىرىستىك قۋاتى 2 ەسە ءوستى.
الماتى قالاسى ەنەرگەتيكا جانە سۋمەن جابدىقتاۋ باسقارماسىنىڭ حابارلاۋىنشا، جۇرگىزىلىپ جاتقان جۇمىستاردىڭ ارقاسىندا 2023 جىلى سۋمەن جابدىقتاۋ جەلىلەرىنىڭ توزۋى 2022 جىلعى 55،7% — دان اعىمداعى جىلدىڭ سوڭىنا قاراي 54،3% - عا، ال سۋ بۇرۋ 2022 جىلعى 57،8% - دان 57% - عا دەيىن تومەندەدى. الماتىدا گازداندىرۋ دەڭگەيى 99،4%-عا جەتتى.
وتكەن جىلدىڭ قورىتىندىسى بويىنشا مەگاپوليستە بارلىعى 231 كم ينجەنەرلىك جەلى سالىندى جانە مودەرنيزاسيالاندى، ونىڭ ىشىندە 117 كم سۋمەن جابدىقتاۋ، 96 كم سۋ بۇرۋ جانە 18 كم جىلۋمەن جابدىقتاۋ. سونىمەن قاتار، 13 كارىز سورعى ستانسياسى سالىندى.