قازىرگى ۋاقىتتا جەر تەلىمىنىڭ 22 ۋچاسكەسى ساتىپ الىندى
2023 جىلى الماتى اكىمدىگى «قالقامان» جاڭا مەترو ستانساسىن سالۋعا جانە بىرنەشە كوشە مەن داڭعىلدى ۇزارتۋ ءۇشىن جەر تەلىمدەرىن ساتىپ الۋدى اياقتايدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
الماتى قالالىق جەر قاتىناستارى باسقارماسىنىڭ مالىمەتىنشە، كەلەسى جىلى مەدەۋ اۋدانىنداعى ت. رىسقۇلوۆ داڭعىلى بويىنداعى اينالمالى جول وتكەلىنىڭ قۇرىلىسىنا 7 جەر تەلىمىن، تولە بي كوشەسىن ياسساۋي كوشەسىنەن قالا شەكاراسىنا دەيىن ۇزارتۋعا 270 ۋچاسكە ساتىپ الۋ جوسپارلانىپ وتىر.
سونداي-اق، ت. رىسقۇلوۆ داڭعىلىن ف. وڭعارسىنوۆا كوشەسىنەن قالا شەكاراسىنا دەيىن ۇزارتۋ ءۇشىن 210 جەر تەلىمى ساتىپ الىنادى. بۇدان بولەك، ا. جۇبانوۆ كوشەسىن ب. مومىش ۇلى كوشەسىنەن قالا شەكاراسىنا دەيىن ۇزارتۋ جانە مەتروپوليتەن سالۋ («قالقامان» ستانسياسى) جوبالارى بويىنشا جەر تەلىمدەرىن ساتىپ الۋ اياقتالۋى قاجەت.
مامىر ايىندا تولە بي كوشەسىن قالا شەكاراسىنا دەيىن ۇزارتۋ جۇمىستارى باستالعان بولاتى. ءبىرىنشى ۋچاسكەسى ياسساۋي كوشەسىنەن باستالىپ، ءاشىموۆ كوشەسىنە دەيىنگى ارالىقتى قامتىماق. جوبانى 2023 جىلدىڭ جەلتوقسان ايىندا اياقتاۋ جوسپارلانىپ وتىر.
قازىرگى ۋاقىتتا 270 جەر تەلىمىنىڭ 22 ۋچاسكەسى ساتىپ الىندى.
ايتا كەتەيىك، الماتىدا وسى جىلدىڭ ءبىرىنشى جارتىجىلدىعىندا مەملەكەت قاجەتتىلىگى ءۇشىن 105 جەر ۋچاسكەسى الىندى.