الماتىدا 2023 جىلى «حالىق قاتىساتىن بيۋدجەت» باعدارلاماسى بويىنشا 397 بالالار مەن سپورت الاڭى اباتتاندىرىلدى
اباتتاندىرىلعان بالالار مەن سپورت الاڭىنىڭ ەڭ كوبى المالى اۋدانىندا - 91، مەدەۋ اۋدانىندا - 80، جەتىسۋ اۋدانىندا - 56.
الاتاۋ اۋدانىندا 2023 جىلى 45 جاڭا سپورت الاڭى سالىندى، كوپىرگە جوندەۋ جۇرگىزىلدى، 1135 جارىق نۇكتەسى جاڭعىرتىلدى. بىلتىر مۇندا «حالىق قاتىساتىن بيۋدجەت» جوباسى بويىنشا 54 جوبا ىسكە اسىرىلدى.
اتاپ ايتقاندا، اۋدان تۇرعىندارىنىڭ وتىنىشىمەن زەردەلى شاعىن اۋدانىندا «سيرەن باعى»، احانوۆ كوشەسىندەگى سكۆەر، سايىن كوشەسىندەگى باقىلاۋ الاڭى اباتتاندىرىلىپ، قاراسۋ شاعىن اۋدانىنداعى سكۆەردىڭ قۇرىلىسى باستالدى. اللەيالار، الاڭدار مەن جاياۋ جۇرگىنشىلەر كوشەلەرىن اباتتاندىرۋمەن بىرگە، كەيبىر اۋماقتاعى شامدار اۋىستىرىلىپ، ۇلكەن الماتى ارناسىنداعى كوپىر جوندەلدى.
ايتا كەتەيىك، «حالىق قاتىساتىن بيۋدجەت» جوباسى بويىنشا 2023 جىلعى داۋىستاردىڭ جالپى سانى 2022 جىلعا قاراعاندا 22%-عا كوپ. بۇل اۋدان بيۋدجەتىن وزدەرى ءۇشىن قالاي ءتيىمدى پايدالانۋ كەرەكتىگىن تۇرعىنداردىڭ تاڭداۋىنا قاراي جۇرگىزىلگەن جۇمىستىڭ سۇرانىستا ەكەنى كورسەتەدى.
«حالىق قاتىساتىن بيۋدجەت» - بۇل تۇرعىندار اكىمدىكتەرمەن بىرلەسىپ جەرگىلىكتى بيۋدجەت قاراجاتىن بولىسەتىن جوبا. تۇرعىندار وزدەرى اباتتاندىرۋ يدەياسىن ۇسىنادى، ولاردى جوبا دەڭگەيىنە دەيىن پىسىقتايدى، سودان كەيىن ونلاين داۋىس بەرۋ ارقىلى جەڭىمپازداردى تاڭدايدى.