مەملەكەت باسشىسى قولداعان الماتىداعى مەملەكەتتىك باسقارۋ جۇيەسىن ورتالىقسىزداندىرۋ اۋداندىق اكىمدىك جۇمىسىنىڭ تيىمدىلىگىن ەداۋىر ارتتىرىپ، قالا تۇرعىندارىنىڭ وزەكتى ماسەلەسىن شەشۋدى جەدەلدەتتى، دەپ حابارلادى الماتى اكىمى ەربولات دوسايەۆ وكق بريفينگىندە.
«2023 جىلدىڭ 1 ساۋىرىنەن اۋداندىق دەڭگەيگە 15 فۋنكسيا بەرىلدى. 8 اۋداننىڭ بيۋدجەتى 2022 جىلى 51،6 ملرد.تەڭگەدەن 2023 جىلدىڭ 1 جەلتوقسانداعى جاعداي بويىنشا 162،9 ملرد. تەڭگەگە دەيىن 3 ەسەدەن اسا ۇلعايتىلدى. ورتالىقسىزداندىرۋ اياسىندا اۋدان اكىمدىكتەرى بيىلعى جىلدىڭ 11 ايىندا 326 مىڭ م2 جول توسەمىن جوندەدى. 177 شاقىرىم سۋمەن جابدىقتاۋ جانە كارىز تاراتۋ جەلىلەرى سالىندى»، — دەدى ەربولات دوسايەۆ.
سونىمەن قاتار بالالاردى قولداۋ باعدارلاماسىن جۇزەگە اسىرۋ جالعاسۋدا. تەگىن ۇيىرمەلەرگە بارۋ ءۇشىن 90 مىڭعا جۋىق ۆاۋچەر بەرىلدى. سونىڭ ىشىندە 47 213 - شىعارماشىلىق تاپسىرىسقا جانە 42 691 - سپورت ۇيىرمەسىنە. قالا اكىمىنىڭ 2024 جىلى 8 اۋداننىڭ بيۋدجەتى تاعى 20،5%-عا ءوسىپ، 196،4 ملرد. تەڭگەگە جەتەتىنىن ايتتى.