الماتىدا 2021-2025 جىلدار ارالىعىندا 708 ەسكى ءۇيدى ءسۇرىپ، جاڭاسىن سالۋ جوسپارلانىپ وتىر.
الماتىدا 2021–2025 جىلدارعا ارنالعان تۇرعىن ءۇي قورىن جاڭارتۋ باعدارلاماسى اياسىندا ەسكى ۇيلەردى ءسۇرۋ، تۇرعىنداردى كوشىرۋ ماسەلەسىنىڭ قالاي جۇزەگە اساتىنى بەلگىلى بولدى، دەپ حابارلادى Almaty-akshamy.kz.
«الماتى» اكك اق باسقارما ءتوراعاسى اسقار بىلىسبەكوۆتىڭ ايتۋىنشا، ەسكى ۇيلەر ءسۇرىلىپ، ولاردىڭ ورنىنا كوپقاباتتى جاڭا ۇيلەر سالىنادى.
تۇرعىندار ۋاقىتشا باسپاناعا كوشىرىلىپ، قۇرىلىس اياقتالعاننان كەيىن ولار 7–10 شارشى مەترگە ارتىق جاڭا پاتەر الادى. ال قالعان پاتەرلەردى ينۆەستورلاردىڭ ساتۋىنا بولادى.
الماتىدا 2021-2025 جىلدار ارالىعىندا 708 ەسكى ءۇيدى ءسۇرىپ، جاڭاسىن سالۋ جوسپارلانىپ وتىر. بۇعان قوسا، بولاشاقتا تاعى 709 ەسكى ءۇيدى ءسۇرۋ كەزەكتە تۇر. اسقار بىلىسبەكوۆتىڭ ايتۋىنشا، الماتىدا ەسكى ۇيلەردىڭ شوعىرلانۋى ايتارلىقتاي جوعارى. ەڭ ماڭىزدى نۇكتەلەر رەتىندە 1930–1975 جىلدار ارالىعىندا سالىنعان 1427 ءۇي تاڭدالىپ الىنعان. ءدال ءقازىر جۇرگىزىلەتىن جۇمىستار ەكى كەزەڭگە ءبولىنىپ وتىر.
بۇگىندە 708 ەسكى ءۇيدى ءسۇرىپ، جاڭاسىن سالۋ جوسپارلانعان. ولاردىڭ 458ء-ى جەكە ينۆەستيسيالار ەسەبىنەن، 280ء-ى بويىنشا جۇمىستار جۇرگىزىلىپ جاتىر. سونداي-اق، بيۋدجەتتىك قارىز ەسەبىنەن 250 ءۇي جاڭارتىلادى.
جالپى، ەسكى ۇيلەردى ءسۇرۋ جانە اۋىستىرۋ بارلىق تۇرعىن 100 پايىز كەلىسىم بەرگەندە عانا جۇزەگە اسادى. ءوز كەزەگىندە «الماتى» اكك اق باسشىسى اسقار بىلىسبەكوۆ الماتى تۇرعىندارىن وسى ماسەلەلەردى بەلسەندى تالقىلاۋعا شاقىردى. تۇرعىنداردى ماجبۇرلەپ ۇيلەردى بۇزبايتىنىن دا ەسكەرتە كەلە، 10 ادامنىڭ بىرەۋى باعدارلامادان باس تارتسا، ءۇيدىڭ سۇرىلمەيتىنىن ايتتى.