جولداردى ورتاشا جوندەۋگە شامامەن 17 ملرد تەڭگە ءبولىندى
الماتىدا بيىل ءساۋىر ايىنىڭ سوڭىندا جول-قۇرىلىس جۇمىستارى باستالدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
اگەنتتىكتىڭ رەسمي ساۋالىنا قالالىق اكىمدىكتىڭ بەرگەن جاۋابىنا سايكەس، شاھاردا 224 كوشەنىڭ جول جابىنىنا ورتاشا جوندەۋ جۇرگىزىلمەك.
«جوندەلەتىن جولداردىڭ جالپى ۇزىندىعى 200 شاقىرىمنان اسادى. جولداردى ورتاشا جوندەۋگە شامامەن 17 ملرد تەڭگە ءبولىندى»،- دەلىنەدى اكىمدىكتىڭ جاۋابىندا.
سونداي-اق، اكىمدىكتىڭ مالىمەتىنشە، قازىرگى ۋاقىتتا قالانىڭ اباي داڭعىلى بويىندا (ساين كوشەسىنەن وتەگەن باتىر كوشەسىنە دەيىنگى ارالىقتا) ۇزىندىعى 2 شاقىرىمنان استام جول جابىنىنا ورتاشا جوندەۋ جۇمىستارى جۇرگىزىلۋدە. جول جوندەۋ اياسىندا اقاۋلى جيەكتەردى ءىشىنارا اۋىستىرۋ قاراستىرىلعان. ءقازىر اتالعان ۋچاسكەدە جيەكتەردى تۇزەتۋ جۇمىستارى جۇرۋدە. گرانيتتى جيەكتەر اۋىستىرۋعا جاتپايدى.
«بۇل – جيەكتەردىڭ بولشەكتەلىپ، ءجۇرىس بولىگىنىڭ قاجەتتى بەلگىسىنە تۇزەتىلىپ جاتقانىن بىلدىرەدى. بولشەكتەلگەن جيەكتەر ءوز ۋچاسكەسى ءۇشىن مونتاجدالادى. قايتا پايدالانۋعا جاتپايتىن اقاۋلى جيەكتەر عانا ءىشىنارا اۋىستىرىلادى. جيەكتەر تەكسەرىس پەن اقاۋلاردىڭ انىقتالۋ شاماسىنا قاراي اۋىستىرىلادى. جيەكتەر ءۇشىن جەكە قاراجات بولىنبەيدى، جۇمىستار ورتاشا جوندەۋ شەڭبەرىندە جۇرگىزىلەدى. ماماندار اقاۋلاردىڭ انىقتالۋىنا قاراي قاجەتتى ۋچاسكەلەردەگى جيەكتەردى اۋىستىرىپ، تۇزەتۋدى جۇرگىزەدى»،- دەپ جاۋاپ بەردى اكىمدىكتەن.
ەسكە سالايىق، مەگاپوليستە بيىل ۇزىندىعى 221 كم بولاتىن 224 كوشەگە، ونىڭ ىشىندە ۇزىندىعى 56،9 كم بولاتىن قالانىڭ 19 ماگيسترالدى كوشەسىنە ورتاشا جوندەۋ جۇرگىزىلمەك ەكەنىن حابارلاعانبىز.