2023 جىلعى 12 جانە 14 شىلدەدە الماتى قالاسىندا ۇلتتىق قاۋىپسىزدىك كوميتەتى ءىس-شارالار وتكىزدى.
ناتيجەسىندە 2 ەسىرتكى زەرتحاناسى مەن حيميالىق پرەكۋرسورلاردىڭ ءىرى قويماسى جويىلدى، دەپ حابارلايدى Almaty-akshamy.kz قازاقپاراتقا سىلتەمە جاساپ.
10 كەلىدەن اسا «مەفەدرون» سينتەتيكالىق ەسىرتكى، 15 تونناعا جۋىق پرەكۋرسورلار، سونىمەن قاتار 4-5 ەسىرتكى زەرتحاناسىن ىسكە قوسۋعا مۇمكىندىك بەرەتىن ارنايى قۇرالدار انىقتالىپ، تاركىلەندى.
ەسىرتكى ازىرلەۋ ۇستىندە رەسپۋبليكامىزدىڭ 4 ازاماتى ۇستالىپ، ولارعا قاتىستى سوت سانكسياسىمەن قاماۋعا الۋ تۇرىندەگى بۇلتارتپاۋ شاراسى قولدانىلدى.
بۇل فاكتىلەر بويىنشا سوتقا دەيىنگى تەرگەپ-تەكسەرۋ جۇرگىزىلۋدە.
ۇقك بيىلعى جىل باسىنان بەرى 24 ەسىرتكى زەرتحاناسىن، 20 حالىقارالىق جانە 23 ايماقتىق ەسىرتكى ارنالارىن جويىپ، 780 كەلى سينتەتيكالىق ەسىرتكى مەن 68 توننادان اسا پرەكۋرسورلاردى تاركىلەدى.
ەسىرتكى جانە پسيحوتروپتىق زاتتار مەن ولاردىڭ انالوگتارىنىڭ زاڭسىز اينالىمىنا، ساتىلۋىنا، ساقتالۋىنا، ازىرلەنۋىنە، وسىرىلۋىنە، وڭدەلۋىنە جانە ساتىپ الىنۋىنا قاتىسى بار قىلمىستار زاڭ تالاپتارىنا ساي 3 جىلدان 20 جىلعا دەيىنگى مەرزىمگە باس بوستاندىعىنان ايىرۋعا جازالانادى.