الماتىدا 119 ۆاكسينالاۋ پۋنكتى جۇمىس ىستەيدى.
الماتىدا ءبىر تاۋلىكتە 3 521 تۇرعىن كوروناۆيرۋسقا قارسى ۆاكسينا الدى. بۇل تۋرالى قالالىق قوعامدىق دەنساۋلىق ساقتاۋ باسقارماسى ءمالىم ەتتى، دەپ حابارلايدى Almaty-akshamy.kz قازاقپاراتقا سىلتەمە جاساپ.
«9 اقپان كۇنى 3 521 الماتىلىق ۆاكسينا سالدىردى. ۆاكسينا سالدىرعاندار سانى بويىنشا الماتى قالاسى الدىڭعى ورىندا. وتكەن جىلدىڭ 1 اقپانى مەن بيىلعى 9 اقپان ارالىعىندا قالادا 1 078 369 تۇرعىن ۆاكسينانىڭ ءبىرىنشى كومپونەنتىن، 1 041 775 ادام ەكىنشى كومپونەنتىن سالدىرعان. ونىڭ ىشىندە 124 282 ادامنىڭ جاسى 60-تان اسقان»، - دەپ حابارلادى باسقارمادان.
بۇگىنگى تاڭدا Pfizer (Comirnaty) كومپانياسىنىڭ ەكپەسىن 47 463 ادام سالدىردى. ونىڭ ىشىندە 2 451 جۇكتى ايەل، بالا ەمىزەتىن 10 456 انا جانە 34 556 ءجاسوسپىرىم بار.
«بۇگىنگى تاڭدا قالادا مەديسينالىق ۇيىمداردا 119 ۆاكسينالاۋ پۋنكتى جۇمىس ىستەيدى. 140 ۆاكسينالاۋ بريگاداسىندا 520 مەديسينا قىزمەتكەرى جۇمىلدىرىلدى»، - دەپ اتاپ ءوتتى الماتى قالاسى قوعامدىق دەنساۋلىق باسقارماسىنىڭ باسپا ءسوز قىزمەتى.