الماتىدا تۇڭعىش رەت ۇلى قازاق اقىنى، ويشىلى جانە اعارتۋشىسى اباي قۇنانباي ۇلىنىڭ 180 جىلدىعىنا وراي ارنايى ازىرلەنگەن «الاشتىڭ ابايى» اتتى تەاترلاندىرىلعان-كونسەرتتىك قويىلىم كورەرمەنگە جول تارتتى.
رەسپۋبليكا سارايىنىڭ ساحناسىندا قازاق ونەرىنىڭ مايتالماندارى ابايدىڭ ولمەس ولەڭدەرى مەن اندەرىن ورىنداپ، ءسوز، مۋزىكا جانە حورەوگرافيا ءبىرتۇتاس كوركەم تۋىندىعا توعىستى. بۇل اسەرلى ساحنالىق كورىنىسكە 200-دەن استام ونەرپاز قاتىستى.
قويىلىمدى قازاقستان تەاتر جانە كينو ونەرىنىڭ اڭىزى، كسرو حالىق ءارتيسى، قازاقستاننىڭ ەڭبەك ەرى ءاسانالى ءاشىموۆ اشتى. ول ابايدىڭ تەرەڭ ويلى جىرلارىن وقىپ، كورەرمەنگە سىرلى سەزىم سىيلادى. ونىمەن بىرگە ساحناعا تۇڭعىشباي جامانقۇلوۆ پەن سايات مەرەكەنوۆ شىعىپ، ونەر كورسەتتى. بۇدان سوڭ «جاڭا عاسىر» تەاترى مەن «سالتانات» بي ءانسامبلى «اباي–توعجان» اتتى ساحنالىق قويىلىم ۇسىندى.
الماتى قالاسى مادەنيەت باسقارماسىنىڭ باسشىسى عاني مايلىبايەۆ اتاپ وتكەندەي:
«الماتىلىقتار ابايدىڭ مەرەيتويىنا ارنالعان ءىس-شارالارعا بەلسەنە قاتىسۋدا. بۇگىن تاڭەرتەڭنەن باستاپ اباي داڭعىلىندا ورنالاسقان اقىن ەسكەرتكىشى ماڭىنا شامامەن 5 مىڭ ادام جينالىپ، ونىڭ اڭىزعا اينالعان اندەرىن ورىنداپ، گۇل شوعىن قويدى. سول كۇنى كەشكە 200-دەن استام ارتيست رەسپۋبليكا سارايى ساحناسىندا اباي قۇنانبايۇلىنا ارنالعان ارنايى تەاترلاندىرىلعان قويىلىم كورسەتتى. جالپى، قالا اكىمدىگىنىڭ باستاماسىمەن مەرەيتوي اياسىندا 120-دان استام مادەني ءىس-شارا ۇيىمداستىرىلىپ جاتىر»، — دەدى ول.
ساحناعا ەرەكشە اسەر بەرگەن كورىنىستەردىڭ ءبىرى «Sensitive» بي تەاترىنىڭ ءنومىرى بولدى. ەستۋ قابىلەتى ناشار ونەرپازدار جۇرەك پەن قيمىل ءتىلى ارقىلى ابايدىڭ جىر جولدارىن جەتكىزىپ، زالدا وتىرعان ءار جاننىڭ كوڭىلىن تولقىتتى.
كورەرمەندەردى سونداي-اق 100 بالادان قۇرالعان «بوزتورعاي» حورىنىڭ «ءبىز – ابايدىڭ ۇرپاعىمىز» اتتى ساحنالىق قويىلىمى ءتانتى ەتتى.
ساحنا تورىندە روزا رىمبايەۆا، ايگۇل قوسانوۆا، ۆەنەرا الپىسبايەۆا، «الاتاۋ» ءداستۇرلى ونەر تەاترىنىڭ ارتيستەرى، «جەتىگەنشىلەر»، «IL CANTO» انسامبلدەرى جانە باسقا دا ونەر ۇجىمدارى ونەر كورسەتتى. كورەرمەندەر «كوزىمنىڭ قاراسى»، «سەگىز اياق»، «ايتتىم سالەم، قالامقاس»، «جەلسىز تۇندە جارىق اي» سەكىلدى قازاق مادەنيەتىنىڭ قازىناسىنا اينالعان شىعارمالاردى تىڭدادى.
كەشتىڭ شارىقتاۋ شەگىندە بارلىق قاتىسۋشى مەن حور «جەلسىز تۇندە جارىق اي» ءانىن بىرلەسە ورىنداپ، مەرەكەنىڭ مايلى نۇكتەسىن قويدى. مىڭداعان كورەرمەن رۋحاني مۇراعا دەگەن تەرەڭ العىستى، ابايعا دەگەن شەكسىز قۇرمەتتى بىرگە سەزىندى.