بۇگىن الماتى الەمدىك مۋزىكا ارەناسىنىڭ ءبىر بولىگىنە اينالدى.
دجەننيفەر لوپەستىڭ Up All Night اتتى الەمدىك تۋرى اياسىنداعى كوپتەن كۇتكەن كونسەرتى ءۇشىن قالاعا 8 مىڭنان اسا تۋريست ارنايى كەلدى. الدىن الا مالىمەتكە سۇيەنسەك، كورەرمەندەردىڭ ۇشتەن ءبىرى – الەمنىڭ تۇكپىر-تۇكپىرىنەن كەلگەن قوناقتار. بۇل - الماتى جاھاندىق مۋزىكالىق يندۋستريانىڭ جاڭا ورتالىقتارىنىڭ بىرىنە اينالعانىنىڭ ءبىر كورىنىسى.
كونسەرت بيلەتتەرى تۇگەلدەي ساتىلىپ كەتكەن. ولاردى 35-تەن اسا ەلدىڭ تۇرعىندارى ساتىپ العان. ەڭ كوپ قىزىعۋشىلىق تانىتقاندار: تمد ەلدەرى، ەۋروپا، اقش، ءباا، سونداي-اق كانادا، تۇركيا، جاپونيا، جۇڭگو جانە وڭتۇستىك كورەيا ازاماتتارى. بۇل شارانىڭ حالىقارالىق دەڭگەيىن كورسەتىپ، الماتىنىڭ ايماقتاعى جاڭا مادەني استانا رەتىندەگى مارتەبەسىن نىعايتادى.
تۋريستەر قاتارىندا قىرعىزستان، اقش، ءباا، گەرمانيا، تۇركيا، ۇلىبريتانيا، فرانسيا، لاتۆيا، يسپانيا، بەلارۋس، گرۋزيا، ازەربايجان جانە اۋعانستاننان كەلگەن قوناقتار بار. سونداي-اق كانادا، شۆەيساريا، جۇڭگو، پولشا، ساۋد ارابياسى، مەكسيكا، كاتار، فينليانديا، شۆەسيا، دانيا، ليتۆا، رۋمىنيا، چەحيا، ۋكراينا، سينگاپۋر، نيدەرلاند، ەستونيا، زامبيا، تايلاند جانە باسقا دا كوپتەگەن ەلدەردەن كورەرمەندەر كەلدى.
شەتەلدىك تۋريستەر الماتىدا ورتا ەسەپپەن ۇش-بەس كۇن بولىپ، وسى ۋاقىت ىشىندە شامامەن 1 500 دوللار جۇمسايدى. بۇل قاراجات ءقوناقۇي، مەيرامحانا، كولىك، ەكسكۋرسيا، ساۋدا جانە وزگە دە قىزمەتتەرگە كەتەدى. مۇنداي اۋقىمدى شارالار تەك جانكۇيەرلەردى عانا بىرىكتىرىپ قويماي، ءتۋريزمنىڭ دامۋىنا دا سەرپىن بەرىپ، الماتىنىڭ مادەني جانە گاسترونوميالىق استانا رەتىندەگى ءيميدجىن كۇشەيتەدى، سونداي-اق قالانىڭ نەگىزگى ەكونوميكالىق سەكتورلارىنداعى بەلسەندىلىكتى ارتتىرادى.
ماسكەۋدەن ارنايى كەلگەن يانا ەسىمدى قوناق ءوز اسەرىن ءبولىستى.
«بۇل كونسەرتكە كەلگەنىمە وتە قۋانىشتىمىن. قالاىڭىز تاماشا! كورىكتى جەرلەرى، تاۋلارى، اس ءمازىرى كەرەمەت! بارلىعى ۇنادى، بۇل كەش ەسىمدە ۇزاق ساقتالادى»، - دەيدى ول.
الماتىداعى كونسەرت قازاقستاندىق جانكۇيەرلەردىڭ ءوتىنىشى بويىنشا تۋر كەستەسىنە قوسىلعان. ول قالانىڭ الەمدىك مۋزىكا يندۋسترياسىنداعى جاڭا ورتالىق رەتىندەگى مارتەبەسىن بەكىتە تۇسەتىن مادەني وقيعا بولماق.