9 ايدىڭ قورىتىندىسى بويىنشا الماتى ونكولوگيالىق ورتالىعى 16409 ناۋقاسقا مامانداندىرىلعان ونكولوگيالىق كومەك كورسەتتى، دەپ حابارلادى اوو ديرەكتورى نۇرسۇلتان يزباگامبەتوۆ.
ارنايى ينفۋزومات پەن ىڭعايلى كرەسلو ورناتىلعان اوو كۇندىزگى ستاسيونارىندا جىل باسىنان بەرى 10 263 ناۋقاس حيميوتەراپيا كۋرسىنان وتكەن.
800-گە جۋىق پاسيەنت ساۋلەلىك ەم الدى، ولار جوعارى ەنەرگيالىق جەلىلىك ۇدەتكىشتە جوعارى تەحنولوگيالىق ساۋلەلىك تەراپيانىڭ 13 مىڭنان استام سەانسىنان ءوتتى.
2 مىڭنان استام وپەراسيا جاسالدى. الماتى ونكولوگيالىق ورتالىعىندا قازىرگى تاڭدا لاپاروسكوپيا كومەگىمەن وڭالتۋ ۋاقىتىن قىسقارتىپ، وپەراسيادان كەيىن اسقىنۋدى بولدىرمايتىن بىرەگەي زاماناۋي وپەراسيالار جاسالادى.
«بىزدە ۇلكەن حيرۋرگيا بولىمشەسى بار، وندا گينەكولوگيالىق، ماممولوگيالىق، كەۋدە قۋىسىنا، ءابدومينالدى جانە نەسەپ-جىنىس مۇشەلەرىنە ءتۇرلى وپەراسيا جاسالادى. بارىنە جوعارى تەحنولوگيالىق كومەك كورسەتىلەدى. بۇرىن مۇنداي شاعىن ءينۆازيۆتى تەحنولوگيالىق كومەك الۋ ءۇشىن شەتەلگە بارۋ كەرەك بولاتىن. وتالاردىڭ جارتىسى شاعىن ءينۆازيۆتى ادىسپەن جاسالادى. ورتالىقتىڭ قۇرال-جابدىعى جەتكىلىكتى، قاجەتتى ماتەريالدار تولىق كولەمدە بار. شەتەلگە بارىپ وتا جاساتۋدىڭ قاجەتى جوق»، - دەيدى الماتى ونكولوگيالىق ورتالىعى حيرۋرگيالىق قىزمەتىنىڭ باسشىسى نۇرلان بالتايەۆ.
قازىرگى كەزدە الماتىدا 31196 ونكولوگيالىق ناۋقاس تىركەلگەن.
الماتىدا قاتەرلى ىسىكتى ەرتە كەزەڭدە انىقتاۋ ءۇردىسى ارتىپ كەلە جاتقانى قۋانتپاي قويمايدى. بۇعان قالا ەمحانالارىندا جۇرگىزىلگەن سكرينينگتىڭ ارقاسىندا قول جەتكىزىلدى.
ونكولوگتار سكرينينگتىك تەكسەرۋدەن ءوتۋدىڭ ماڭىزدىلىعىن ەسكە سالادى. سكرينينگ اۋرۋدى ەرتە كەزەڭدە انىقتاۋعا كومەكتەسەدى ءارى امان قالۋ مۇمكىندىگى جوعارى بولادى - 90%.
«ەلىمىزدە سكرينينگتەر تەگىن جۇرگىزىلەدى، پروفيلاكتيكالىق تەكسەرۋگە ۋاقتىلى بارۋ كەرەك. وكىنىشكە قاراي، تۇرعىندار كوبىنە سكرينينگكە ءمان بەرمەي، ەلەي قويمايدى. قاتەرلى ىسىك نەعۇرلىم ەرتە انىقتالسا، ساۋىعىپ كەتۋ ىقتيمالدىعى سوعۇرلىم جوعارى بولادى»، - دەپ تۇسىندىرەدى ن.يزباگامبەتوۆ.