قالا اۋماعىندا ەلەكترلى ساموكاتتاردىڭ جىلدامدىعى – 25 كم/ساع بولىپ بەكىتىلدى.
الماتى قالاسىنىڭ اكىمدىگى مەن ەلەكترلى ساموكاتتاردى جالعا بەرەتىن وپەراتورلار مەگاپوليستە قۇرال قولدانىسىن رەتتەۋ ماقساتىندا ىنتاماقتاستىق پەن ءوزارا تۇسىنىستىك تۋرالى مەموراندۋمعا قول قويدى، دەپ حابارلايدى Almaty-akshamy.kz
مەموراندۋم اياسىندا ەلەكترلى ساموكاتتارمەن جاياۋ جۇرگىنشىلەر جولاعىندا، ساياباقتاردا جانە بۇقارالىق ءىس-شارالار وتەتىن قوعامدىق ورىنداردا جۇرۋگە تىيىم سالىنادى. قالا اۋماعىندا ەلەكترلى ساموكاتتاردىڭ جىلدامدىعى – 25 كم/ساع بولىپ بەكىتىلدى.
سونداي-اق، ەلەكترلى ساموكاتتاردى تەك 16 جاسقا تولعان تۇلعالار عانا جالعا الا الادى. وپەراتورلار مەترو مەن قوعامدىق ورىنداردىڭ كىرەبەرىسىندە، كوگالدا، كولىك جانە جاياۋ جۇرگىنشىلەر جولاعىندا قالدىرىلعان ەلەكترلى ساموكاتتاردىڭ بىردەن ارنايى ورىندارعا جەتكىزىلۋىن قامتاماسىز ەتۋى ءتيىس. ول ءۇشىن قالادا ەلەكترلى ساموكاتتارعا ارنالعان تۇراق اۋماقتارى ۇيىمداستىرىلادى.
كەلەسى جىلدىڭ سوڭىنا دەيىن ەلەكترلى ساموكاتتارعا ارنالعان 3 000 تۇراق ورنىن ۇيىمداستىرۋ جوسپاردا. سونداي-اق، تاراپتار سەرۆيس جۇمىسىن قىس مەزگىلىندە اۋا رايىنا بايلانىستى جۇرگىزۋدىڭ ناقتى شارتتارىن بەلگىلەدى. مىسالى، 15 جەلتوقساننان 20 اقپانعا دەيىن ورتاشا اۋا تەمپەراتۋراسى 2 گرادۋستان تومەندەگەن جاعدايدا جالعا بەرۋ اۋماعى قىسقارادى ءارى ەلەكترلى ساموكاتتاردىڭ 10%-ى عانا جالعا بەرىلەدى.
اتالعان مەموراندۋم شارتتارىندا كورسەتىلگەن بارلىق پۋنكتەردى جۇزەگە اسىرۋ ناتيجەسىندە ەلەكترلى ساموكاتتاردىڭ قولدانىسىن رەتتەۋ، قاۋىپسىزدىك دەڭگەيىن ارتتىرۋ، ءتيىستى ينفراقۇرىلىمدى دامىتۋدى قامتاماسىز ەتۋ جوسپارلانعان. جالپى، ميكروموبيلدى كولىكتىڭ، ونىڭ ىشىندە ەلەكترلى ساموكاتتاردىڭ دامۋى قورشاعان ورتانى لاستاۋ دەڭگەيى مەن جەكە كولىكپەن ءجۇرۋ جيىلىگىن تومەندەتۋگە اسەر ەتەتىندىگى، بۇل ءوز كەزەگىندە قالا كوشەلەرىنىڭ جۇكتەمەسىن تومەندەتۋگە دە ىقپال ەتەتىندىگى اتالىپ ءوتتى.
كۇن سايىن قالادا ەلەكترلى ساموكاتتارمەن 100 مىڭعا جۋىق قوزعالىس قامتاماسىز ەتىلەدى. ەسكە سالساق، ەلەكترلى ساموكاتتار الماتى قالاسىندا 2018 جىلى 100 دانادان باستاپ جالعا بەرىلە باستادى. قازىرگى كەزدە قالادا 4 كومپانيا (Ozim، Jet، Eleven، Whoosh) 15 مىڭ ساموكاتتى جالعا بەرۋ قىزمەتىن ۇسىنادى.