الماتىدا كەشەگى داۋىلدان وتىزعا جۋىق اعاش قۇلاپ، 13 كولىكتى باسىپ قالعان.
سەكۋندىنا 24 مەتر جىلدامدىقپەن سوققان جەل اقساي شاعىن اۋدانىنداعى №132 مەكتەپتىڭ شاتىرىنىڭ كەي جەرىن ۇشىرىپ كەتكەن. ارتىنشا بولعان نوسەر جاۋىننان قالانىڭ تومەنگى اۋداندارىنداعى جەكە ۇيلەردىڭ اۋلاسى مەن كوشەلەردى سۋ باستى. قالانىڭ كەيبىر بولىكتەرىندە ەلەكتر جارىعى ءسونىپ قالدى.
اۋا رايىنىڭ قولايسىزدىعىنا بايلانىستى قالانىڭ توتەنشە جاعداي قىزمەتتەرى مەن كوممۋنالدىق كاسىپورىندار تۇنىمەن جۇمىس ىستەدى. تاڭعا دەيىن داۋىل مەن نوسەر جاۋىننىڭ سالدارىنان قۇلاعان اعاشتار كەسىلىپ، جولدار تازارتىلدى. ال شاتىرى ۇشقان مەكتەپكە، مەردىگەر ۇيىم وقۋشىلاردىڭ كانيكۋلى اياقتالعانشا جوندەۋ جۇمىستارىن جۇرگىزەدى.
«قازگيدرومەت» بۇگىن جانە ەرتەڭ الماتىدا 8 مم-گە دەيىن جاڭبىر جاۋادى دەپ بولجاپ وتىر.
نۇرلان اتىعايەۆ، الماتى قالاسى تجد باسشىسى: - جەكە ۇيلەردىڭ اۋلا اۋماقتارىن 38 سۋ باسۋ تۋرالى حابارلامالارعا دەپارتامەنت كۇشتەرى مەن قۇرالدارى بىرگە بارلىق قوڭىراۋلارعا ۋاقىتىلى دەن قويىپ، جۇمىس ىستەدى. قازىرگى ۋاقىتتا بارلىق وقيعالار جويىلدى. قالاداعى جاعداي تۇراقتى. ابىروي بولعاندا، زارداپ شەككەن ادامدار تۋرالى اقپارات تىركەلگەن جوق.