«تازا قازاقستان» باعدارلاماسى اياسىنداعى «الماتى – ءبىزدىڭ ورتاق ءۇيىمىز» اكسياسى اياسىندا قالادا جاڭا ۆانداليزمگە ءتوزىمدى قوقىس جاشىكتەرىن ورناتۋ باستالدى. بۇل باستاما سانيتارلىق جاعدايدى جاقسارتىپ، كوشەلەردىڭ لاستانۋ دەڭگەيىن تومەندەتۋگە باعىتتالعان. بەكىتىلگەن جوسپارعا سايكەس، 2025 جىلى الماتىدا 12 036 جاڭا قوقىس جاشىگى ورناتىلادى. ولاردىڭ كولەمى 80 جانە 120 ليتر، دەپ حابارلايدى aqshamnews.kz
كوممۋنالدىق ينفراقۇرىلىمدى دامىتۋ باسقارماسىنىڭ مالىمەتىنشە، بۇل جاشىكتەر اۋدان اكىمدىكتەرىنىڭ ءوتىنىمى نەگىزىندە ورناتىلىپ، قالانىڭ تازالىعىن جاقسارتۋعا ارنالعان. قوقىس جيناۋ بارىسىن جەڭىلدەتۋ ءۇشىن جاشىكتەردىڭ ىشىندە 120 ليترلىك پوليەتيلەن پاكەتتەر قاراستىرىلعان.
الماتى اكىمدىگى جۇرگىزگەن تالداۋ كورسەتكەندەي، قالا كوشەلەرىندە 40-60 ليترلىك قولدانىستاعى قوقىس جاشىكتەرى تەز تولىپ، قوقىس ماسەلەسىن ۋشىقتىرىپ وتىر. وسىعان بايلانىستى، ەسكىرگەن جاشىكتەردى اۋىستىرۋ تۋرالى شەشىم قابىلداندى:
• 80 ليترلىك گيپەربولويدتى قوقىس جاشىكتەرى ساياباقتار مەن سكۆەرلەرگە ورناتىلادى.
• 80 ليترلىك ءتورتبۇرىشتى جانە سيليندرلىك جاشىكتەر قالانىڭ نەگىزگى كوشەلەرى مەن ماگيسترالدارعا قويىلادى.
• 120 ليترلىك ءتورتبۇرىشتى جاشىكتەر حالىق كوپ جينالاتىن ورىندارعا – ايالدامالارعا، مەترو بەكەتتەرگە، جەرۇستى جانە جەراستى وتكەلدەرىنە ورناتىلادى.
2024 جىلى قالا بيلىگى قولدانىستاعى جاشىكتەردىڭ تەز تولۋىنا بايلانىستى قوقىس شىعارۋ مارشرۋتتارىن كوبەيتۋگە ءماجبۇر بولدى.
ەسكە سالا كەتەيىك، الماتى اكىمدىگى «تازا قازاقستان» باعدارلاماسى اياسىندا «الماتى – ءبىزدىڭ ورتاق ءۇيىمىز» ەكولوگيالىق ناۋقانىنىڭ باستالعانىن حابارلادى. ول 2025 جىلعى 1 ناۋرىز – 1 ءساۋىر ارالىعىندا وتەدى. ناۋقاننىڭ ماقساتى – تۇرعىنداردىڭ ەكولوگيالىق مادەنيەتى مەن جاۋاپكەرشىلىگىن ارتتىرۋ.
ناۋقان 4 نەگىزگى كەزەڭگە بولىنگەن، ونىڭ العاشقىسى – «تازا كوشەلەر». بۇل كەزەڭدە ايالدامالار، باعدارشامدار، وتكەلدەر، جول بەلگىلەرى مەن جارىقتاندىرۋ قۇرىلعىلارى تازارتىلادى، سونداي-اق قوعامدىق ورىندارعا جاڭا قوقىس جاشىكتەرى ورناتىلادى.
«الماتى – ءبىزدىڭ ورتاق ءۇيىمىز» ناۋقانى تۋرالى بارلىق اقپارات Almaty.kz سايتىندا جاريالانادى.