بۇل قالادا جۇرگىزىلگەن «تۇنگى قالاداعى بالالار» ءىس-شاراسىنىڭ ناتيجەسى.
الماتىدا 12 قاڭعىباس بالا ارنايى بەيىمدەۋ ورتالىعىنا ورنالاستىرىلدى، – دەپ حابارلايدى Almaty-akshamy.kz Polisia.kz-كە سىلتەمە جاساپ.
«شارانىڭ ماقساتى – كامەلەتكە تولماعاندار اراسىنداعى قۇقىق بۇزۋشىلىقتىڭ، قاراۋسىزدىقتىڭ الدىن الۋ جانە بولدىرماۋ، تۇنگى ۋاقىتتا كامەلەتكە تولماعانداردىڭ ويىن-ساۋىق مەكەمەلەرىندە جانە ۇيدەن تىس جەرلەردە زاڭدى وكىلدەرىنسىز ءجۇرۋ فاكتىلەرىن انىقتاۋ، سونداي-اق، كامەلەتكە تولماعانداردى قوعامعا قارسى ارەكەتتەرگە تارتاتىن ەرەسەكتەر، بالالاردىڭ تاربيەسىنە نەمقۇرايلى قارايتىن اتا-انالار، سونىمەن قاتار بالالار ەڭبەگىن پايدالانۋ فاكتىلەرى، كامەلەتكە تولماعاندارعا الكوگول مەن تەمەكى ونىمدەرىن ساتۋ فاكتىلەرىن انىقتاۋ، – دەدى الماتى قالالىق پد جپقب يۋۆەنالدى پوليسيا ءبولىمىنىڭ باستىعى جاننا شونجانوۆا.
ءىس-شارانىڭ ءتورت كۇنىندە 295 ءجاسوسپىرىم ىشكى ىستەر ورگاندارىنا ءتۇرلى قۇقىق بۇزۋشىلىقتار ءۇشىن جەتكىزىلدى، سونىڭ ىشىندە اكىمشىلىك قۇقىق بۇزۋشىلىقتار ءۇشىن – 281، قاراۋسىز قالعانى جانە پاناسىزدىعى ءۇشىن 14، ونىڭ ىشىندە قاراۋسىز قالعان 12 بالا قيىن ومىرلىك جاعدايداعى بالالاردى قولداۋ ورتالىعىنا ورنالاستىرىلدى. جەتى ءجاسوسپىرىم جانە توعىز قولايسىز وتباسى انىقتالىپ، ەسەپكە الىندى.
«سونىمەن قاتار 272 اتا-انا كامەلەتكە تولماعان بالالارىنىڭ ويىن-ساۋىق مەكەمەلەرىندە جانە ۇيدەن تىس جەرلەردە زاڭدى وكىلدەرىنسىز جۇرگەنى ءۇشىن اكىمشىلىك جاۋاپكەرشىلىككە تارتىلدى. تۇندە زاڭدى وكىلدەرىنسىز ويىن-ساۋىق مەكەمەلەرىنە كىرگىزگەنى ءۇشىن ويىن-ساۋىق مەكەمەلەرىنىڭ ءۇش لاۋازىمدى ادامى اكىمشىلىك جاۋاپكەرشىلىككە تارتىلدى. سونداي-اق الكوگول ونىمدەرىن ساتۋدىڭ سەگىز فاكتىسى، ءۇش تەمەكى ونىمدەرى جانە كامەلەتكە تولماعاندار تۇندە داياشى بولىپ جۇمىس ىستەگەن ەكى ويىن-ساۋىق مەكەمەسى انىقتالدى. اتا-انالار ءۇشىن باقىلاۋدىڭ جەتكىلىكسىزدىگى جاسوسپىرىمدەردىڭ قۇقىق بۇزۋشىلىققا بارۋىنا نەمەسە ولارعا قارسى زاڭسىز ىس-ارەكەتتەر جاساۋىنا اكەلۋى مۇمكىن ەكەنىن ءبىلۋى جانە ءتۇسىنۋى ماڭىزدى، سونداي-اق ولاردىڭ تاربيەسى ءۇشىن جاۋاپكەرشىلىكتى ۇمىتپاۋ كەرەك»، – دەدى جاننا شونجانوۆا.