2026 جىلدان باستاپ الماتىدا 11 الەۋمەتتىك ماڭىزى بار اۋرۋ بويىنشا دياگنوستيكا، باقىلاۋ مەن ەمدەۋ ساقتاندىرىلعان مارتەبەسىنە قاراماستان تۇرعىنداردىڭ بارلىعىنا قولجەتىمدى بولادى.
وڭىرلىك كوممۋنيكاسيالار قىزمەتىندە الماتى قالاسى قوعامدىق دەنساۋلىق ساقتاۋ باسقارماسى باسشىسىنىڭ ورىنباسارى ءلايلا يمانعالييەۆا وسىلاي دەدى.
سپيكەردىڭ ايتۋىنشا، الەۋمەتتىك ماڭىزى بار اۋرۋلاردىڭ تىزىمىنە تۋبەركۋلەز، ايتۆ-ينفەكسياسى، قاتەرلى ىسىكتەر، سوزىلمالى ۆيرۋستى گەپاتيتتەر مەن باۋىر سيرروزى، پسيحيكالىق جانە مىنەز-قۇلىقتاعى اۋىتقۋلار، ورفاندىق اۋرۋلار، ەپيلەپسيا، ينسۋلت پەن جەدەل ميوكارد ينفاركتى، سونداي-اق جۇيكە جۇيەسىنە قاتىستى ءبىراز اۋرۋ كىرىپتى.
«ماڭىزدى وزگەرىستىڭ ءبىرى الەۋمەتتىك ماڭىزى بار اۋرۋعا شالدىققان جاعدايدا ناۋقاستىڭ ساقتاندىرىلعان مارتەبەسىنە قاراماستان قاجەتتى دياگنوستيكالىق تەكسەرۋ تاعايىندالادى. بۇعان دەيىن مۇنداي مۇمكىندىك تۋبەركۋلەز نەمەسە ايتۆ-ينفەكسياسىن جۇقتىردى دەگەن كۇدىك بولعان كەزدە عانا قاراستىرىلعان ەدى»، – دەدى ءلايلا يمانعالييەۆا.
ول 2025 جىلى قىركۇيەكتەن باستاپ الماتىنىڭ بارلىق تۇرعىنى ونكولوگيالىق اۋرۋلاردى ەرتە انىقتاۋ ماقساتىندا سكرينينگتىك تەكسەرىستەن تەگىن وتەتىنىن دە ەسكە سالدى. بۇرىن مۇنداي مۇمكىندىككە ساقتاندىرىلعان ازاماتتاردىڭ عانا قولى جەتەتىن. سونىمەن قاتار، 2026 جىلدان باستاپ ءمامس پاكەتى دە كەڭەيتىلەدى. وعان ديسپانسەرلىك ەسەپتە تۇرعان سوزىلمالى اۋرۋلارى بار ناۋقاستار، ونىڭ ىشىندە قانت ديابەتى، ارتەريالىق گيپەرتەنزيا، جۇرەكتىڭ يشەميالىق اۋرۋى، بۇيرەك، تىنىس الۋ اعزالارى، تىرەك-قيمىل جۇيەسى اۋرۋلارى مەن باسقا دا دەرتپەن اۋىراتىن ازاماتتار ەنگىزىلەدى.
«بۇل پاسيەنتتەرگە دارى-دارمەكپەن قامتىلىپ، امبۋلاتوريالىق جانە ستاسيونارلىق جاعدايدا ەمنىڭ بارلىق قاجەتتى ءتۇرىن، ونىڭ ىشىندە قىمبات پرەپاراتتار الۋىنا مۇمكىندىك بەرەدى»، – دەدى ءلايلا يمانعالييەۆا.