الماتىدا جەكە ينۆەستيسيالاردىڭ ەسەبىنە سالىنعان 103 توسەك-ورىندىق زاماناۋي جاتاقحانا اشىلدى. مۇندا ستۋدەنتتەرگە جايلى بولمەلەر، اس بولمەسى، وقۋعا جانە دەمالۋعا بارلىق جاعداي جاسالعان. سونىمەن قاتار، ينتەرنەتپەن (wi-fi) قامتاماسىز ەتىلگەن كوۆوركينگ ايماعى دا قاراستىرىلعان، دەپ حابارلايدى aqshamnews.kz
«جاتاقحانا كەرەمەت! بولمەلەرى كەڭ ءارى جارىق، قاجەتتىنىڭ ءبارى بار. اسحانا دا وتە ىڭعايلى، تاعامدارى ءدامدى. Wifi جىلدامدىعى دا تاماشا، ساباق وقۋعا وتە ىڭعايلى»، - دەدى جاتاقحانا تۇرعىنى ەربول بالتابايەۆ.
الماتى قالاسى جاستار ساياساتى باسقارماسىنىڭ مالىمەتىنشە، وقۋ جىلى باستالعانعا دەيىن الماتىدا 1920 ورىندىق 6 جاتاقحانا اشىلدى، ال جىل سوڭىنا دەيىن الماتى قالاسى اكىمدىگىنىڭ جوبالىق كەڭسەسىنىڭ قولداۋىمەن 3105 ورىندىق 4 نىساندى پايدالانۋعا بەرۋ جوسپارلانىپ وتىر. 2024 جىلى جالپى 5025 ورىندىق 10 نىساندى، 2025-2026 جىلدارى 34 295 ورىندىق 33 نىساندى پايدالانۋعا بەرۋ كوزدەلگەن.
«مەنىڭ جاتاقحانام وتە ىڭعايلى. كوۆوركينگ ايماعى زاماناۋي جابدىقتارمەن قامتىلعان، سوندىقتان ساباعىمدى وقىپ، جوبالارىمدى جاساۋ ءۇشىن تاماشا ورىن. جۇمىس ىستەپ وتىرعان كەزدە باسقا ستۋدەنتتەرمەن قارىم-قاتىناس جاساپ، تاجىريبە الماسۋعا دا مۇمكىندىك بار. سونىمەن قاتار، جاتاقحانامنىڭ ايالداماعا جاقىن ورنالاسۋى وتە ىڭعايلى. كەز كەلگەن باعىتقا باراردا ۋاقىتتى ۇنەمدەپ، قالا ىشىندە ەركىن قوزعالا الامىز»، - دەدى ستۋدەنت ادىلەت دوسىمبەكوۆ.
ەستەرىڭىزگە سالا كەتەيىك، جاتاقحانا قۇرىلىسىن ءتيىمدى ۇيلەستىرۋ ءۇشىن ستۋدەنتتىك جاتاقحانالار قۇرىلىسى بويىنشا جوبالىق كەڭسە جۇمىس ىستەپ تۇر. جوبالىق كەڭسەنىڭ نەگىزگى مىندەتى الماتى قالاسىندا جاتاقحانالار قۇرىلىسى بويىنشا مەملەكەتتىك باعدارلامانى ىسكە اسىرۋ جانە ستۋدەنتتەردى تۇرعىن ۇيمەن قامتاماسىز ەتۋ ءۇشىن قولايلى جاعداي جاساۋ. جوبالىق كەڭسە اشىلعاننان باستاپ 120 الەۋەتتى ينۆەستور جۇگىندى، ونىڭ 67ء-سى ءقازىر جۇمىسقا كىرىسكەن، بۇل قولداۋ مەحانيزمىنىڭ تارتىمدىلىعىن كورسەتەدى.
انىقتاما ءۇشىن: +77015282837 – ستۋدەنتتىك جاتاقحانا قۇرىلىسى بويىنشا جوبالىق كەڭسەنىڭ باسشىسى دامير كۋتۋموۆ.